Hamburger Unterkünft

Während minnem Studium hab ich ä Praktikum bii Philips g'macht. "Röhren- und Halbleiterwerke", Hamburg. Ä halb's Johr lang als Badener in de scheenschte ditsche Großstadt. Oder wie's bii'm Janosch ("Robinson Hase") heißt: "Hamburg, Welthafen"!
In dem halbe Johr hab ich an drey verschiedene Stelle g'wohnt:

Fir de erschte Monat hab ich vun'ere Studentin ä Zimmer in'eme Studentewohnheim zwische g'mietet. Des war praktisch, will's grad bii Philips um d'Eck war, unn ich jede Dag z'Füäß zum Schaffe hab laufe kinne. Des Wohnheim war direkt am Rand vun'eme kleine Park in'ere nette Wohngegend, do het ma's also güät üsshalte kinne.
Ich kann mich noch güät an die erschte Obende in dem Hochhüüs erinnere, wie ich üss'em Fenschter uff die Stadt nüss g'schaut hab, unn de Himmel war vun denne ganze Lichter daghell erleuchtet! Was war ich fasziniert vun derre Großstadt!
Leider war des Zimmer halt nit länger frey, unn dänooch hab ich au kein ander's Zimmer in dem Wohnheim meh bekumme.

Fir die letschte vier Monat hab ich ziemlich schnell ä Zimmer in'eme andere Studentewohnheim (Osterstrooß, ei U-Bahnstation hinter'm Hauptbahnhof) g'funde. Dert hab ich mit zwei Engländer in'eme Dreyer-Appartment z'sämme g'wohnt. Entsprechend kann ma die Zitt mit "Party, Party, Party" ziemlich kompakt z'sämme fasse...

Äber der Monät däzwische, der war ä Problem! Es war eifach nix Bezahlbar's z'finde!
Also hab ich erscht mol minni zwei Woche Urlaub g'numme.
Die andere zwei Woche hab ich als Zwische-Mieter in'ere ziemlich runterg'kummene Behausung unni warm's Wasser g'wohnt. Eigentlich hätt ich jo schun stutzig werre solle, wu der Besitzer (ä mittelalter, freakiger G'sell) statt "Moment mal" immer "Zement mal" g'sayt het... Aber ich war so verzweifelt, dass ich des "Loch" in sinnem Urlaub halt doch ibbernumme hab.
Es war allerdings so schmuddelig, dass ich obends lieber irgendwu in de Stadt unterwegs g'sii bin (zum Glück war's Summer), als heim z'gehn. Unn zum Dusche bin ich bii 'me befreundete Renter-Ehepaar im selbe Stadtteil 'gange...

Ich müäß sage, do het mir die Erfahrung vun Rucksackreise unn Unterkünfte in Entwicklungsländer echt g'holfe! Unn alli Impfunge hab ich zum Glück au g'haa, grins!


Aber so hab ich wenigschtens viel vun Hamburg g'sähne in derre Zitt, weiß
De Bischemer