Ä virtuelli Weltreis

Am Wocheend ware ma widder unterwegs. Aber diesmol anderscht wie sunscht, nämlich virtuell!
Will's mich schun länger interessiert het, hab ich mir nämlich ä VR (Virtual Reality)-Brill g'kauft, wu ma 's Handy nii steckt:

Z'erscht hab ich jo denkt, dass ich daheim g'schimpft wirr, will ich so ä Ziigs anschlepp... Aber schnell war klar, dass d'ganz Familie ä g'höriger Spaß dran het, mit derre Brill vor'em Kopf rumz'laufe.
Do kann ma Achterbahn fahre (dass einem fascht schwindlig wird), bii'm spiele d'Figure nur mit'ere Kopfbewegung lenke, oder beliebigi Plätz uff de Welt im "VR-Modus" b'süache!

Die virtuell Weltreis war dann nadierlich, wie kinnt's bii unserem Fernweh anderscht sii, de Hit. De schiefe Turm vun Pisa, 's Empire State Building vun New York, d'Stränd in Sri Lanka, Machu Picchu, Nepal, Mexico, unn, unn, unn!
Jedem isch immer noch ä Ort iig'falle, wu er mol hinreise unn sich umschaue will!

Ich bin sicher, in de nägschde Zitt wird unser DSL regelmäßig glühe, will mir nit g'nüe dävun kriege, uns do umz'schaue, wu mir entweder schun ware, oder wu mir unbedingt noch hin welle...


Unn do git's noch ä Hüffe Plätz, weiß
De Bischemer

Bravo oder Pop Rocky?

Wu ich jung war, do het's eigentlich nur zwei Zittschrifte fir uns Jugendlichi gää: D'"Bravo" unn d'"Pop Rocky". Sowitt ich mich erinnere kann, isch die "Pop Rocky" immer ä weng uninteressanter oder unwichtiger g'sii.
Wahrschiins isch des dran g'lege, dass es dert tatsächlich vor allem um Pop unn Rock, also um Müssig unn Stars, gange isch.

D'"Bravo" dägege het zwar au immer ibber Stars, Bands unn so ebbis berichtet, aber ganz wichtig (unn fir die Teens spannend) ware dann nadierlich die "Dr. Sommer"-Sitt unn die Beziehungs-G'schichte (au wenn's einem oft peinlich war, wenn ma bii'm lese vun de Foto-Love-Story im Iikaufslade g'sähne worre isch...)

Ich hab mich mol ä weng umg'schaut, unn hitz'dag git's anschiinend nimmi "DIE" Bravo, sondern ä ganzer Stall voll vun Heftli, wie "Bravo Girl", "Bravo Sport" oder "Bravo Poster". So kann sich jeder des kaufe, was ihn am meischte interessiert.

Aber isch des echt noch "Bravo"?, frogt sich
De Bischemer

Liis

Oh, wie ich denne Zettel hass...!

Aber ich müäß anderscht anfange:
In de Grundschüäl hänn d'Kinder die so g'nannt "Schnipsgummimapp". Des isch die Mapp, wu sie die Elternbriäf unn ähnlichi Zettel nii stecke, damit sie nit vergesse, sie daheim abz'gänn. (Ich bin gar nit sicher, ob's die Mapp im Gymnasium au noch git, aber uff jede Fall wird sie dert nimmi "Schnipsgummimapp" heisse...)

Jedefalls war die Woche widder der ominöse Zettel drin, wu, schiint's, mindeschtens ein Mol im Spootjohr kumme müäß: "...möchten wir Sie informieren, dass bei einem Kind Läuse gemeldet wurden!"
NEIN! Dann liäber Elternobend, Schüälfescht unn Vorlesedag uff eimol, als schun widder Liis...!

Wenn ich an des ganze Galama denk, beidi Kinder (unn am beschte au noch uns) mit dem komische Shampoo z'behandle, die Stofftiere in Quarantäne z'stecke unn die ganz G'schicht nooch'ere Woch grad noch emol z'wiederhole.

Also geht jetzt d'Le nur noch mit'eme g'flochtene Pferdeschwanz in d'Schüäl, damit des Risiko wenigschtens minimiert isch.


Unn bisher isch der Kelch noch an uns vorbey 'gange, schnüüft
De Bischemer

Wuanderscht g'lese (25)

Ich will Eych hit emol fir ä Artikel interessiere, wu weder mit Bischem noch mit Oberschopfe z'düe het. Schlimmer noch, er sich nit emol uff ditsch - vun badisch gar nit z'rede...

Trotzdem isch's mir wichtig g'nüe, Eych des Thema vorz'stelle. ' geht nämlich umm de Klimawandel.
Ich hab do däzüe ä Artikel in de New York Times g'funde. Also ä renommierti Quelle, wu sich's Lese uff jede Fall lohnt. Ganz b'sunders, wenn die Informatione au noch mit so beiidruckende Bilder garniert sinn wie in dem Artikel ibber d' Iisschmelze in Grönland.

Ällei schun die Bilder (oder eigentlich sinn's jo Animatione beziehungswiis Filmi) sin's wert, dass ma sich Zitt nimmt däfiir. Unn ä weng Iiblick in so ä Forscheralltag find ich selber eh immer spannend.


Hoffentlich geht's Eych genau so, denkt sich
De Bischemer

Im Rhiin

AM Rhiin sinn sowohl die Badener als au die Bischemer relativ oft unterwegs. Es isch halt eifach scheen, an so 'eme große Fluss entlang z'spaziere oder mit'em Rad entlang z'fahre.
Aber IM Rhiin, do isch ma halt doch ehnder selte. Wenn ibberhaupt, dann viellicht emol im Summer, wenn ma an de Rhiinstrand geht unn 's flache Wasser dert zum plansche unn schwimme nutzt.

Am vergangene Wocheende hämmer aber die (momentan gar nit so selteni) Gelegeheit g'nutzt, im Trockene im Rhiinbett spaziere z'gehn.
Will de Rhiin sither 'em Summer so wenig Wasser führt, kann ma bii Nackenheim nämlich tatsächlich im Flussbett spaziere, will je nach Bereich so etwa 50 bis 100 Meter witt alles trocke leyt.
Do sieht ma plätzlich Sandstein, Wasserpflanze, Schlick, unn nadierlich ä Hüffe Müll. Was mich aber am meischte fasziniert het, des sinn die riesige Muschelbänk, wu do plötzlich zum Vorschiin kumme!
Ich hätt nie denkt, dass es im Rhiin so viel Muschle gitt. Schaue selber:

Uff jede Fall war des ä Erlebnis, an des ma uns lang erinnere werre. Aber hoffe ma mol dass des jetzt in de Zukunft nit zum Normalzüestand wird..

Sunscht isch lätz mit unserem Trinkwasser, fürchtet
De Bischemer

Flohmärkt

Vor kurzem simmer mit de Kinder ibber ä kleiner Flohmärkg g'loffe.
Kei so großer, wu dann ä ganzer Iikaufszentrum-Parkplatz vollsteht. Ehnder so ä Privat-Flohmärkt, aber schun mit g'nüä Material zum wühle unn lüäge.

Es war witzig, wie d'Kinder mit manche Sache so gar nix hänn anfange kinne.
Dass sie die ganze "historische" Kuchi-Geräte wie Flotte Lotte oder manueller Schneebese nimmi kenn, war mir jo klar. Trotzdem het's Spaß g'macht, sie rote z'lehn, fir was ma die Dinger denn brüüche kinnt...

Aber 's beschte war, wu ich ihne eins vun denne schwarze Bakelit-Telefone zeigt hab.

Dass de Hörer mit'eme Kabel am Telefon verbunde isch, war jo noch okay. Aber mit derre Wählschiib hänn sie dann gar nix meh anfange kinne.
Wu ich ihne zeigt hab, wie lang's düürt, bis ma do dämit unseri eige Telefonnummer vun daheim wählt, do ware sie richtig perplex. Unn dass ma sich dann die ganze Telefonnummere vun Freunde unn Verwandte au noch merke (oder in'eme Biachli uffschriibe) müäß, des war schier unvorstellbar...


Lang, lang isch's her, sinniert
De Bischemer

Alles furt!

Ich bin beruflich jo mit IT b'schäftigt. Mit Datenspeicherung, um g'nauer z'sii. Am vergangene Wocheend het de Lu dann au mol de erschte Iidruck (unn gliich d'erscht Lehrstund) zu dem Thema bekumme.

Kürzlich het er sich nämlich ä Tablet kauft, uff dem er sich dann au fleißig sinni Lieblings-Apps installiert het. Dänooch het er g'schafft, virtuelli Welte konstruiert unn neiji Levels freyg'schaltet, dass es nur so ä Pracht war.
Allerdings interessiert er sich so güät wie nit fir Date-Sicherheit oder so ebbis. D'meischte Benachrichtigunge, wu hochkumme, druckt er immer ziemlich schnell weg, unn richtig hinz'schaue... Entsprechend hab ich ihm au schun zwei Mol widder de WLAN-Züägang ney iirichte miän, will er ihn "üss Versähne" g'löscht het.

Am Friddig isch's dann aber richtig ernscht worre. Do het er sich ä "G'sichtserkennung" fir's Tablet installiert. Unn wie Ihr Eych sicher denke kinne, isch er nadierlich irgendwänn nimme an sin Tablet dran kumme, will des Progrämmli nit funktioniert het.
Unn statt dann gliich um Hilfe z'rüäfe, het er witter probiert, bis des Tablet komplett g'sperrt war! Dann war nadierlich 'Holland in Not'...

Am Wocheend hab ich dann also 's Internet durchsüacht unn alles Mögliche üssprobiert, aber der Züegang war dicht! Mir isch nix ander's iibrig bliebe, als alles platt z'mache unn nej z'installiere.
Do dämit ware sinni ganze Welte, Features unn Highscores dann aber leider futsch. "Complete data loss", wie's bii uns in de Firma dann heißt...

Wenigschtens het er g'lernt, dass er nit eifach irgend ebbis installiere oder konfiguriere därf, vun dem er nit versteht, was es genau macht. Unn in so fern het er die Erfahrung hoffentlich grad noch friähj g'nüä g'macht, bevor er WIRKLICH wichtigi Date verliert!

Des hofft zumindescht
De Bischemer