Frühlingsflucht!

Jetzt hämmer so viel verlängerti Wocheend g'haa im Mai, unn d'ganz Zitt isch so ä liädrig's Wetter! Eigentlich däde mir so ä lang's Wocheend gern nutze, umm ä Kurzurlaub z'mache, aber wu soll ma die DEM Wetter ibberhaupt hin? Karibik? Afrika?? Trope???
Wie au immer, fir des Fronleichnams-Wocheend hämmer ä Lösung g'funde: Mir fahre in ä "Ferie-Park" in de Nähdi vun Trier, wu's nääbe 'me Schwimmbad sogar ä Indoorspielplatz, Kinderanimation unn ander's Pipapo gitt! Des heißt, dass d'Kinder (unn mir) au bii Räge güet b'schäftigt sii werre..
Unn alternativ kinne ma dann immer noch nooch Trier fahre, um unseri Kumpels z'b'süache.

Also dann: Nix wie los, rüeft
De Bischemer

Geburtsdag im Rege...!

Geschtern also widder Kindergeburtsdag!
Sibbe wilde Büebe hämmer daheim g'haa. Unn was macht ma mit denne, wenn's drusse nit mol fir fünf Minütte uffheert z'rägle??
Eigentlich hab ich jo mit ihne ä Schatzsüach' durch 's Feld mache welle. Aber wu ich de Wetterbericht g'heert hab, do hab ich mir dann lieber eini am Computer üss'denkt. Jeder vun ihne het dann ä Uffgab in "Google Maps" löse miän, zum Beispiel: "Wie hoch isch de höchschte Vulkan uff Hawaii?", "was steht in de australische Hauptstadt am Wescht-end vum See?", "wu geht die Fähre uff Ditschlands nördlichschter Insel hin?" unn so witter...
Do ware sie echt richtig güät bii de Sach, des war halt mol ebbis Nej's. Am liebschte wär jeder gliich als erschtes dran g'kumme, sie hänn's küüm erwarte kinne!
De Lu het vun de Freunde au noch Lego g'schenkt bekumme, do hänn sie sich dann sofort druff g'stürzt. Ä Film hämmer noch g'schaut ("Rio"), unn Küache unn Spaghetti g'esse. So hämmer des Event eigentlich ganz güät ibber d'Bühne broocht...
... wenn ma nur am Obend dävor nit uff de Woistandtour am Bischemer Bahnhof versackt wäre! ;-)

Aber jetzt sinn die Kindergeburtsdäg widder g'schafft fir dies Johr, stüümt
De Bischemer

Wuanderscht g'lese (7)

Eigentlich bring ich jo nit zwei so "Fremdartikel" hinteränander, aber was ich hit g'lese hab, des will ich eifach witter verteile!
Ihr kenne sicher alli die Sammelsticker, Murmle unn anders Ziigs, die's im Supermarkt an de Kass gitt, wenn ma g'nüe iikauft, gell? B'sunders wer Kinder het, der kann ä Lied dävun singe...
Im Handelsblatt war jetzt ä Bericht dribber, wie raffiniert des isch - oder eigentlich, wie bled mir doch alli sinn, dass mir druff nii fliäge! Wenn ich ällei schun des Zitat lies: "Die Sammelaktionen zielen nicht auf den Hauptentscheider"! Mir lehn uns schlicht unn eifach vun unsere Kinder erpresse!
Aber eigentlich wisse ma des jo selber, gell?

Nur dass de so ä riesiger finanzieller Iifluß het, de verschreckt mich ä weng, meynt
De Bischemer

Wuanderscht g'lese(6)

Diesmol will ich Eych zu n'ere Websytt lotse, wu noch "richtig g'schriebe" wird. Was de Glumm do produziert, isch noch echti Literatur! Ich gib züe, dass die Theme, de Stil unn die Texte ibberhaupt ziemlich g'wöhnungsbedürftig sinn, aber wenn ma Zitt het, dann sott ma sich echt mol ä weng durch sin Werk triibe lehn.
Lese nur mol, wie er ibber de Frank Zapp unn die "echte Siebziger" schriibt. Des isch so lebendig unn authentisch, wie 's sunsch wohl küüm einer hin bekummt! Nadierlich isch des alles vor minnere "wilde Zitt" bassiert, unn bii uns war's nur ä Bruchteil vun dem, was de Glumm erlebt het, aber bii derre Schilderung werre viel Bilder widder im Kopfe lebendig!
Ich lies in dem Blog nit regelmäßig mit, aber wänn immer ich nii schau, bin ich widder fasziniert ibber die Vielfalt vun Theme unn Gedanke! Wer ä weng länger liest, der kriegt mit, dass de Glumm vun Heroin bis zum Herzinfarkt schun alles mitg'macht het. Mit dem Hintergrundwisse werre dann so Texte wie der ibber de Zappa noch lebendiger, find ich!
Unn wie het ä Blogger-Kolleg mol g'schriibe: Es isch eigentlich ä Schand, dass de Glumm mit sinnem Talent immer noch kei Roman g'schriibe het!

Also ich däd ne kaufe, weiß
De Bischemer

Peter unn Timber

In Oberschopfe, do hab ich zittwiis zwei Wellesittich g'haa.
De erschte, des war de Peter. Ä griän-gelber, also so de "klassische" Wellesittich. Nit b'sunders uffällig, aber lieb. Er isch mir uff d'Hand g'floge, wenn ich ihn g'rüäfe hab, unn aus sunscht war er recht züetraulich.
Nooch viele Johre aber, do hab ich g'merkt dass er eigentlich ä "Sie" isch unn konsequenterwiis Petra heiße sott. Er het nämlich plötzlich ang'fange, Eier z'lege. So vier oder fünf insg'samt. Des war echt irritierend, kinne Ihr Eych vorstelle.

Irgendwänn hab ich dann noch ä zweiter Wellesittich däzüe g'kauft, damit de Peter nit immer ällei im Käfig hockt. Des war de Timber. Ä großer, wilder, blau-wysser Kerli. Der isch in de erschte Minütt zum Peter in de Käfig, het ihn mit'eme kräftige Schnabelstoß begrüäßt, unn - rumms - isch de Peter vum Stängli g'keyt. Oh, was het der g'zetert! Vun dem Moment an het er verständlicherwiis Panik vor'em Timber g'haa unn isch vor ihm g'flüchtet! Däbii het de Timber so gern mit ihm spiele welle...!
's End vum Lied war, dass ich ab dann zwei Käfig uff'em Schrank stehn g'haa hab, unn beidi Vögel in Einzelhaft g'halte hab!
Bis zu sinnem Lebensobend het de Peter dann quasi kei rüähgi Minütt mehr g'haa, weshalb er sich au so güet wie nimmi üss'em Käfig nüss traut het... Er het einem echt leid düe kinne!

Wie de Timber zu sinnem Name kumme isch, unn was ich mit ihm erlebt hab, des verzehl ich Eych dann ä ander's Mol...

Unn was hänn Ihr fir Hüüstiere g'haa?, froogt
De Bischemer

Fliederspray

Jetzt bliähjt jo ibberall widder de Flieder. An viele Ecke sieht ma die scheene wysse oder bordeaux-rote Blütebüschel. Unn wie der Flieder riecht...!
Eigentlich isch es jo echt toll, wenn Blüäme oder Blüte so toll rieche, aber bii Fliider hab ich echt ä Problem...
Friäjer, do het minni Mama immer ä Raumspray mit Fliederduft g'haa. Des het sie zwar selte benutzt, aber wenn, dann het 's ganze Hüüs so viehmäßig nach dem künschtliche Flieder g'schmeckt, dass ma 's eifach nit üsshalte het kinne! Ich bin dann immer nüss g'flüchtet, bis sich der Geruch verzoge g'haa het...!
Ibberhaupt war ich als Büe ziemlich empfindlich, was "güeter Geruch" angeht. Ganz schlimm isch's g'sii, wenn d'Mama in Audo, sobald's einem schlecht worre isch, ihr Kölnisch Wasser üsspackt het. Ällei schun vun dem Geruch het's mich g'lupft (kenne Ihr denne Begriff noch???), unn mir isch's ganz dirmelig worre! Ganz allgemeyn isch mir bii Parfüm immer schlecht worre, au wenn des minni Schwestere nie hänn verstehn kinne!
Unn so het sich ebbe des Flieder-Raumspray in minnere Erinnerung so feschtg'setzt, dass ich de Geruch vun echtem Flieder gar nit wirklich genieße kann...

Aber 's git jo au noch g'nüe anderi duftendi Blüte, tröschtet sich
De Bischemer

Mudderdag

Als Service fir alli, wu noch ä G'schenkli zum Mudderdag süache, kummt jetzt ä Gedicht:

Hör Dir mol des Rätsel an:
's isch keine Kind unn 's isch kei Mann!
Also weisch Dü jetzt genau:
Was mir süache isch ä Frau!

Sie däd alles fir Dich düe,
Macht die Wäsch unn heert Dir züe!
Liest Dir obends ebbis vor,
Wäscht Dir d'Ohre, kämmt Dir d'Hoor.

Hesch Dü Büüchweh, kocht sie Supp,
Süacht Dinn Stofftier, Dinni Bubb!
Sie isch immer fir Dich do,
Tröschtet Dich unn macht Dich froh.

Sie isch Lehrer, Doktor, Koch,
Unn au hundert and'ri noch!
So kinnt's ewig witter geh'n,
Au de Letschte wird's verstehn:

D'Mama isch's, des weiß ma doch...
Darum jetzt ä dreyfach's “Hoch“!

Ä scheener Mudderdag wünscht allene Müddere

De Bischemer

Vadderdag

Irgendwie kann ich mich immer noch nit dran g'wöhne, dass hit "minn" Fiierdig isch.. Vadderdag! Des war friäjer immer de Dag, wu mir Kerli ebbis z'sämme unternomme hänn. B'sunders nadierlich die, wu gar kei Vadder sinn... Aber des isch jo wohl au hit noch so!
Aber sither ä baar Johr, do wirr ich jo echt als Vadder g'würdigt an dem Dag. Vor zwei Johr, do het mir de Lukas ä witzigi Tannezapfe-Figur baschtelt, die steht noch immer bii mir im Büro:



Unn fir dies Johr, do hänn sie wohl aus schun widder ebbis vorbereitet.
D'Le, die war däbii au widder ganz speziell: Vorgeschtern sitze mir bii'm Obendesse, do hebt sie mir plötzlich gan uffg'regt d'Hand vor 'd Auge unn meynt: "Schau nit do nooch rechts, do leyt doch Din Vadderdags-G'schenk!" Des het sie baschtelt, dann aber vor lütter Ablenkung vergesse unn nit weg g'rüümt!
Anständig, wie ich bin, hab nadierlich nit hin g'schaut unn loss mich überrasche, was do rüss kummt...

"Eych alle, aber b'sunders de Vädder, ä richtig scheener Vadderdag", wünscht
De Bischemer

Esse im Urlaub (3)

Vor zwei Johr bin ich uff Dienschtreis in Wyssrussland g'sii. Des hänn Ihr viellicht mitbekumme.
Ich war jo ibberrascht, wie "europäisch" es dert üssg'sähne het, b'sunders in den Hauptstadt Minsk. Entsprechend vertraut war au 's Esse - wenn ma d'Speisekart het lese unn ebbis b'stelle het kinne...
Okay, de Schwerpunkt isch schun arg uff Fleisch unn Kartoffle g'lege, aber eigentlich het's alles gää. Unn wenn ich ehrlich bin, dann sinn mir nur drey Sache richtig in Erinnerung bliibe:
Kwass: So ä Art Brottrunk. So ebbis het's friäjer au bii uns mol gää. Aber wu ich des probiert hab (unn gliich au noch zwei Gläser dävun serviert bekumme hab) isch mir au klar g'sii, warum ma des hitz'dag nimmi sieht. Bää!!
Blini sa Smetana: Des het's zum Frühstück immer im Hotel gää: Lauwarmi Omlett mit süürer Sahne. Aber grad des Smetana loßt sich eigentlich nit mit unserer süüre Sahne vergliche, des isch viel cremiger, ä weng siäß unn echt lecker! Ich müäß sage, des war immer ä güäter Start in de Dag!
Birkesaft: In Frühling gehn in Wyssrussland d'Litt wohl in de Wald, um selber de Saft vun de Birke ab z'zapfe - etwa so, wie ma's vun de Bilde üss Kautschuk-Plantage her kennt. De Hit isch aber, dass ma Birkesaft sogar im Tetrapack kaufe kann! Der schmeckt gar nit schlecht, löscht güät de Durscht unn soll sogar g'sund sii!

Unn trotzdem war mir de Wodka liäber, den sie üss Birkesaft brennt hänn, grinst
De Bischemer

Löwezahn

Alles gelb, schaut's Eych nur an,
D'Wies isch voll mit Löwezahn!
D'Blüeme kennt schun jedes Kind,
Au wenn d'Name andersch sind:

Bad'ner schriibe "Seichblüem" hii,
Bii'm Franzos' heißt's "Pissenlit!"...
Richtig edel klingt do schun
's englische "Dandelion"!

Aber 's änder gar nix dran,
Denn au des heißt "Löwezahn"!
Wahrschiins nennt ma d'Blüäm so nett,
Will sie g'zackti Blätter het!

Unn die findesch' gar nit toll,
Hesch de ganze Gaarde voll!
Doch es wird viel schlimmer noch,
So in viellicht ein, zwei Woch!

Dann verbliäjt des gelbe Meer,
Unn kummt plötzlich wyss daher!
Puschtblume, jetzt isch's g'sayt,
Bringe nur de Kinder Freyd!

Alles Kämpfe hilft nit groß,
Löwezahn wirsch eh nit los!
D'rum genieß des scheene Bild,
's isch doch alles halb so wild!


Freye Eych lieber am Mai, appelliert
De Bischemer