Z'friede sii

Z'friedeheit isch kei Gabe, die ma vun usse bekomme kann. Des müäß vun inne kumme.
So wie bii uns. Okay, mir kaufe nit alli zwei Johr ä ney's Audo, unn ä Flatscreen-Fernseher hämmer immer noch nit. Vum iPhone oder iPad gar nit z'rede. 's isch nadierlich au ä Froog, ob ma sich ibber des definiert, was ma het, oder ibber des, was ma isch unn erlebt.
Mir freye uns ebbe immer widder an dem, was mir erlebe. Ällei schun de Alltag als Familie macht uns glücklich, aber d'Krönung sinn immer widder unseri Reise! Mir sähne viel vun de Welt, unn im Gegesatz zu viele andere kinne mir unseri Reiseluscht sogar noch z'sämme mit unsere Kinder üsslebe, die au schun Spaß dran hänn!


Zum Glück setze d'Sandra unn ich do d'gliche Prioritäte (sunscht hätte mir uns jo wohl au küüm in Peru bi'm Trecking kenne g'leert, oder??)
Fir ä Rucksackurlaub irgendwo in de Welt verzichte mir beidi gern uff ä ney's Audo oder anderer Schnickschnack... Unn offesichtlich hämmer unseri Kinder au schun so iig'nordet. Kürzlich het de Lukas g'froogt, warum mir kei so toll's Audo wie s'Noochbers hänn (die fahre ä nejer, schicker VW Bus). Aber dann het'm d'Sandra verzehlt, dass die Noochbere halt au nit jedes Johr so interessanti Reise wie mir in de Weltg'schicht rum mache, unn dann het de Lukas g'meynt: "Ah..! Also do sinn mir d'Reise schun wichtiger...!"
Güät so, schließlich hämmer au in 2011 widder vor, einigi neyi Plätz uff de Welt z'sähne... Die Planunge laufe schun!

Unn Ihr werre's dann mitkriege, verspricht
De Bischemer

Ball schun...

Hänner's g'heert? D'erschte Vögel singe schun widder...!
Unn hänner's g'sääne? D'Sunn zeigt sich morgens endlich widder ä weng friäjer..!
Geht's Eych au so, dass so langsam ä frischer Salat widder besser schmeckt als wie Zuckerbrödli?
Spüre'n'Ihr 's au schun? De Winterschloof geht so langsam in d'Friäjjöhrsmüdigkeit ibber ...
Okay, d'Nas schmeckt ehnder noch Schneeluft als Frühlingsduft, aber Wunder kann ma im Jänner jo au nit verlange, oder?


Glaube mir, au dies Johr wird de Winter ä End finde, unn de Frühling wird kumme!

Hänn noch ä weng Geduld, motiviert Eych
De Bischemer

Unseri alt Gardehütti in de Rääbe

In Oberschopfe in de Rääbe hänn mir sither viele Johre ä Hütti stehn. Ich kann mich nur noch dunkel erinnere, wie minner Babba die baut het, unn mir als kleini Stöpsel um d'Baustell drum rum g'rännt sinn.
Die Hütti isch üss Holzpaneele baut, mit Isolierung däzwische, unn so groß wie ä güät's Zimmer. Iig'richtet isch sie mit massivem Holzdisch, 'enere Eckbank unn 'nem alte Kanabee. Do drin het's immer ä weng muffig g'schmeckt, will eifach z'wenig g'lüftet wird - au wenn hinter de Fenschterläde 's Fenschter fascht immer uff bliebe isch.
Mit minnem Babba hab ich ä baar mol dert ibbernachtet. Meischtens am Samschtig obend. Dann simmer hing'fahre, sobald's dunkel worre isch, hänn Bettdecke unn alles mitg'numme unn hänn dert g'schloofe. Am nägschde Morge simmer zum Frühstück dann widder heim g'fahre.
Will's üsser 're alte Audobatterie kei Strom (unn au kei Wasser) gää het, hämmer Daschelampe unn Kerze däbii g'haa. Des war für mich als kleiner Büä immer ä Abenteuer, kann ich Eych sage! Vor allem die Geräusche vun denne Tiere, die ma nachts um die Hütti rum g'heer het... Des war dertmols mindeschtens genau so spannend wie später minni erscht Ibbernachtung im Urwald, des kann ich Eych sage!
Ich hab au ü baar Geburtsdäg dert obbe g'fiirt, aber will ma jo alles (Disch unn Bänk, Esse, Trinke, Müssig, ...) het nuff schleppe miän isch's uns dann irgendwann z'viel worre.
Die Hütti steht immer noch, unn inzwische isch sie vun denne Baim, die friäjer drum rum pflanzt worre sin, richtig scheen iig'wachse.
Aber 's macht halt fascht keiner meh ebbis dämit...

Echt schad, findet
De Bischemer

Jede Samschdig 's Gliiche!

"Warum?", murmel ich verschloofe,
Will de Herrgott mich denn stroofe?
's isch noch nit mol viertel acht,
Doch sie isch schun rum, die Nacht!
Eigentlich isch d'Le min' Glück,
Doch sie isch sooo hibbelig!
Quasselt, hopst unn stubst mich an,
Dass ich nimmi schloofe kann.
Dann, kei viertel Stund dänooch
Kummt au noch de Lukas hoch!
Jedi Woch des selbe Lied:
Wochedaags sinn beidi miäd.
Kriegsch sie fascht nit üss'em Bett,
Wie wär Samschdig's des mol nett!
Aber nei, am Wocheend
Hänn s' am siebe üssgepennt...


Kenne Ihr des au so, froogt
De Bischemer

D'Ortenau vun wittem (7)

In Lohr war am Wocheend Narretreffe. Ang'fange het des mit'eme Treffe im Stiftsschaffneikeller.
Schun sither 'eme Vierteljahrhundert, isch de Stiftsschaffneikeller ä güäter Anlaufpunkt fir Kultur unn Müssig in Lohr. De Kulturkreis het do ganz scheen ebbis bewegt! Hüät ab! Schun zu minnere Lohrer Zitt war der Keller immer ä güäti Adress, um ä b'sunder's Konzert z'heere oder emol "Kultur" im Städtli z'erlebe...
Unn an dem Begriff "Stiftsschaffneikeller" het ma dertmols schun d'Lohrer unn d'Nicht-Lohrer üssenander halte kinne. Fir d'Lohrer war des Wort ganz normal, aber d'Nicht-Lohrer hänn sich do dran jo schier d'Zung abbroche... Ob des wohl nach fünfezwanzig Johr immer noch so isch? Also, jetzt alli mol lütt uffsage: "Stiftsschaffneikeller, Stiftsschaffneikeller, Stiftsschaffneikeller..."

Hoffentlich hänn Ihr Eych nix 'broche, lacht
De Bischemer

Arche-Erinnerunge

Friäjer ware mir jo Mittwochs immer Stammgäscht in de Arche. Des war de Oldie-Obend, do bisch am beschte noch mit Batik-T-Shirts oder bunte Hose ang'kumme. An andere Wochedäg het sich d'Welt sogar in de Arche widder drillt, aber am Mittwoch isch sie quasi in de siebziger Johr stehn bliebe!
Unn entsprechend war ebe au d'Müssig. Fasch nur altes Ziigs, ziemlich spezielli Versione, unn viel, was ma dertmols als "Kiffer-Müssig" bezeichnet het! Min absolut's Lieblingslied am Mittwoch war "Gamma Ray" von Birth Control, wenn des kumme isch hab ich immer danze miän. Zehn Minüte Vollgas, des hesch erscht emol durchhalte miän!
Kei Wunder dass mir eigentlich vun dem ganze Abrocke am End, wenn's Licht angange isch, kabütt unn naßgschwitzt ware! Do war des Scheene, dass uff'em Heimweg vun Waldkirch ä baar Baggersee uff'm Weg g'lege sinn. Im Summer sinn ma do manches Mol noch schnell nii g'hopst. Zitwiis hämmer sogar extra ä Handtüach im Audo g'haa fir denne Fall (Badhos / Bikini hesch jo nit brücht...).
Am Mittwoch isch ma sich vorg'kumme wie ä große Familie. Ma het eigentlich d'meischte Litt zumindescht vum sähne kennt. Nur wenn am nägschte Dag ä Fiirdig war (Fronleichnam oder sunscht einer, der uff de Dunnerschdig g'falle isch), dann ware Unmenge vun "Danz-Tourischte" in de Arche. Dann hesch am Iigang schun anstehn miän, 's war kei Platz zum richtig danze, unn die ganze Krankeschwestere, Altepfleger unn Zivis (normalerwiis g'fühlti 50 Prozent vun de Litt) sinn irgendwie untergange... Dann war's meischtens au nur halb so scheen, au wenn d'Arche dann ä Stund länger uff g'haa het als sunscht...

Tja, inzwische isch d'Arche sither 12 Johr züä, sinniert
De Bischemer

Ällei!

"Ällei zu lebe isch nit güät!",
Schreyt de Bischemer voll Wüät.
Wu sinn minni Schätzli hin,
Unni die macht des kei Sinn!

Minni (allerbeschti!) Frau
Weiß des selber jo genau.
Sie isch Wohl unn Weh' fir mich,
Unni sie isch's fürchterlich!

Sither Lu unn Le gebore
Bin Familiemensch ich g'worre!
Minni kleine, große Schätz,
Unni die isch's Lebe lätz!

Ja, mir fehlt des Kinderlache,
Kumm mir vor wie nit ganz 'bache!
Will nit schloofe, will nit esse,
Langsam kansch mich echt vergesse!

Manchmol isch Ällei-sii toll,
Aber jetzt hab d'Schnauz ich voll!
Roote mol, wuvun ich draim:
Morge kumme sie dann heim!!


Ä breites Grinse uff'm G'sicht kriegt
De Bischemer

Saga unn Suzuki

Min erschtes richtig großes Konzert, des war bii Saga in Freyburg. Als Vorgrupp het Loverboy g'spielt. Echt klasse! Wu mir des uff'm Plakat g'sähne hänn, do war gliich klar, dass mir do hin miän! Bii uns in de Gegend, in Lohr oder Offeburg, do hesch jo so Konzerte vergesse kinne, do sinn so Gruppe nie hin kumme...
Ich war grad siebzehn Johr alt, wie d'meischte andere, die mit mir dert hin sinn. Nur einer vun denne, de Charly, der het schun de Führerschiin un ä Suzuki-Jeep g'haa. Mit dem sinn mir vollb'setzt nach Freyburg g'fahre. Ich weiß des noch so genau, will mir uff de Rückfahrt noch ebber mit heim g'numme hänn, obwohl 's Audo eigentlich schun voll war. Z'siebt (!) sinn mir dann die fuffzig Kilometer in dem kleine Suzuki heim g'fahre, bii Schneetriibe: Hinte sin die drey gröschte Kerli g'hockt, ä Maidli isch quer ibber allene druf g'lege, unn drey Kerli ware vorne nebenander drin. Des war so eng, dass ich vorne in de Mitte uff'm Hebel fir d'Differentialsperr hab hocke miän... Was war ich froh, als die Fahrt rum war....
's Konzert war nadierlich au ä Erlebnis, unn Saga isch noch vieli Johre lang eini vun minnene Lieblingsbands bliebe (Unn ich heer sie au jetzt noch immer ganz gern...).

Aber iigeprägt het sich vor allem d'Heimfahrt, versichert Eych
De Bischemer

Zum Wocheend

Als Iistimmung uff's Wocheend hab ich jetz noch ebbis richtig Toll's fir Eych. Des zeigt mol widder, wie scheen d'Welt isch. Unn zwar nit nur im Badnerland oder in Bischem, sundern ganz generell! Also basse güät d'ruff uff, mir hänn nur eini!



Ä b'sunders scheen's Wocheend wünscht Eych
De Bischemer

After-Skate-Parties

Wu ich noch ällei in Mainz g'wohnt hab, so um 2001 rum, do het's im Summer jedi Woch ä "Skatenight" gää. Do sinn ä baar Hauptstroße in de Mainzer Innestadt g'sperr worre, unn dann het ma mit Skates im Kreis rum fahre kinne. Bi'm Gutebergplatz war dann au noch Müssig unn Ständ mit Esse unn Trinke uff'baut, des war immer ä richtig scheen's Obend-Event.
Dänooch sinn mir dann meischtens noch mit fünf, sechs Litt zu mir heim unn hänn Disco g'macht. Uff Skatersocke, mit viel Grappa vunn de Anne unn ziemlich lütter Müssig. Die Parties hänn sich mit de Zitt ä feschter Platz in unsere Wocheplanung g'sichert, unn wu dann's Wetter fir's Skate z'schlecht worre isch, do het echt ebbis g'fehlt. Will ganz unni Anlaß sinn die Parties eifach nit zum fliege kumme...
Zum Glück hänn in dem Hüüs fascht nur alti Litt g'wohnt, die hänn wahrschiens an dem Obend immer 's Hörgerät üssg'schaltet. Anderscht kann ich mir nit erkläre, dass sich nie ebber bii mir beschwert het ibber die lütt Müssig. Ich hab sogar mol minni Noochberi g'frogt, ob mir z'lütt g'sii wäre, unn do war die ganz überrascht, dass ich ibberhaupt so ebbis froge däd.

Oder sie het nur so g'macht, will ich halt so ä netter Noochber war, grinst
De Bischemer

Widder daheim!

So, ich bin widder im Land. Nit im Ländli, aber im Land. Z'ruck in Ditschland. Minni drey Schätz allerdings sinn noch in Öschtrich bliebe, die fliege erscht in knapp zwei Woche widder z'ruck.
's wird also widder ä langi, stilli Zitt gää do im Hüüs. Ich kinnt jetzt schun müüdrig werre, wenn ich do so ganz ällei hock, unn iberall die "Familiesache" rumleye...
Aber halt, sag ich mir dann, 's het grad ä ney's Johr ang'fange, 's git viel z'düä unn z'erlebe, also riss dich z'sämme!

In dem Sinn wünsch ich Eych alle (unn mir au) ä ganz toller Start in's Johr 2011, uff dass Eych alles glückt, was Ihr anfange!

Prosit Neyjohr, rüäft
De Bischemer