Mol widder ibber's Wetter...

Mensch, was isch des fir ä Wetter,
Soll des echt de Summer sii??
Hoffentlich wird's ball mol netter,
Wu führt des noch hii??

Es isch kalt, schun sither Woche,
Unser Frühling war ä Witz,
Nur letscht' Woch' war's kurz zum koche,
Drey Dag Affe-Hitz'...

Schau, was d'Siebeschläfer triibe!
So viel Rege macht kei Spaß!
Sibbe Woche soll's so bliibe?
Richtig kalt unn nass??

Petrus, denke mol an die Kinder,
Ball sinn d'Ferie dran.
Es isch Summer, Dü machsch' Winter!
Streng Dich endlich an!


ES LANGT JETZT, schreyt
De Bischemer

D'Ortenau vun wittem (28)

Des war also d'Jubiläumsfiir! Wie d'letscht Woch schun vorher g'sayt, war ich nit selber däbii, aber ich hab mir geschtern obend üssführlich dävun verzehle lehn!
So Menschemenge het Oberschopfe sicher schun sither Johre nimmi, wenn nit ibberhaupt jemols g'sähne. G'schätzti Zehndausend solle's g'sii sii, unn dass do des Dörfli quasi üss alle Nähte platzt isch, kann ma sich vorstelle! Ällei 1500 Litt sinn jo bii'm Umzug schun mit g'loffe. Des sinn jo schun mehr wie d'Hälfti vun dem, was Oberschopfe an Iiwohner het!
Alles in allem war's also ä herrlich's Fescht, unn die ganze Vorbereitunge hänn sich g'lohnt, so schiint's.

Oberschopfener kinne halt fiire, weiß
De Oberschopfener, äh, Bischemer

D'Ortenau vun wittem (27)

Oberschopfe, jetzt gilt's! Am Wocheend wird de 1250-schte Geburtsdag g'fiirt!

Leider bin ich nit däbii, aber ich kann jo uff'em Mainzer Johannisfescht so mache, als wär's 'es Oberschopfener Fescht ;-)
's Johannisfescht isch zwar zwei bis dey Nummere größer, unn wird au jedes Johr g'fiirt, aber do däfiir isch Mainz halt au ä weng größer als Oberschopfe...

Wenn ich uff de Oberschopfener Websytt lies, was do alles geplant isch, dann kann ich nur sage: Hüet ab, Oberschopfener, do stelle Ihr so einiges uff d'Bay! Ich bin stolz uff "unser Dorf".
Immerhin hab ich jo mehr als minn halbes Lebe lang in Oberschopfe g'wohnt - wenngliich's au langsam knapp wird: Noch fünf Johr, dann bin ich länger furt, als ich dert g'sii bin! Aber die erschte Lebensjohre oder Johrzehnte sinn jo eh die wichtigschte (unn g'fühlt die längschte), also wirr ich au nooch denne fünf Johr immer Oberschopfener bliebe!

Uff de andere Sytt: Warte nur mol ab, wass in Bischem ä Woch druff bii de Kerb lauft, des isch wahrschiins noch um einiges spektakulärer.. Ich wirr's Eych dänooch verzehle!

Jetzt aber erschtmol ä Hoch uff Oberschopfe, rüäft
De Bischemer

Ä Ära geht z'End...

Am Samschdig war ich bii'm (wahrschiins) letzte Kindergarde-Fescht!
Sechs Johr lang hab ich jede Morge uff'em Weg zum Schaffe erscht de Lu, dann Lu unn Le, unn am End nur noch d'Le in de Kindergarde broocht. Die ganz Prozedur mit Parkplatz süache, Schüäh üss- unn Schlabbe anziähge, nochmol uff de Arm nemme, unn anfangs mehr, später weniger oft Träne bii'm Verabschiede, die isch in derre Zitt eifach zum normale Bestandteil vum Tagesprogramm worre.
Ich kann mir gar nit vorstelle, dass des alles nooch de Summerferie eifach weg sii wird... 's het jo lang g'nüe düürt, bis sich des Kindergarde-gehn zum Normalfall iig'schwunge het, unn nit jede Morge bii'm Verabschiede ä klein's Drama inszeniert worre isch. Aber sither de Lu nimmi im Kindergarde isch, isch d'Le au viel selbständiger worre, kinnt ma meyne.
In de letschte Zitt hab ich jo sogar ä weng 's G'fühl g'haa, dass sie des ganze Handkusswerfe, winke unn Mit-de-Händ-ä-Herzli-forme hauptsächlich macht, damit ICH z'friede bin... Jedefalls drillt sie sich momentan so schnell widder weg, dass ich mir fast schun ä weng vernachlässigt vor kumm. Ihri Freundinne sinn morgens schun viel wichtiger als ich, schiint's!

Sie werre halt so schnell flügge, stüümt
De Bischemer

Esse im Urlaub (4)

Anno 2001, do isch in Laos die tourischtisch Diir ä weng uff'gange. Vorher het ma als Privatperson fascht gar nit durch's Land reise kinne, aber ab dert het ma ganz eifach am Flughafe vun Vientiane (so heißt d'laotisch' Hauptstadt) ä Tourischtevisum für drey Woche bekumme.
Also bin ich mit'm Ingo gllich mol hin, 's Land anschaue...
Gliich an dem Wocheend, wu ma ang'kumme sinn, hämmer 's Lichterfescht am Mekong mit bekumme. Tausendi vun Lytt uff de Strooß, unn fascht alli ä Kopf kleiner als mir langi Europäer.. so het ma sich wenigschtens nit verirre kinne!

Was es esse angeht, do merkt ma in Laos, dass sich friäjer d'Franzose der feschtg'setzt g'haa hänn: An alle Ecke git's Baguette z'kaufe, unn de Standard-Imbiss (ob am Busbahnhof oder an Strooßeständ) war "Baguette with Paté", also ä uffg'schnitte's Baguette mit Fleischpastete druff. Lecker, aber irgendwann ziemlich eisyttig!

Noch vorherrschender, unn au viel laotischer, war aber de Kleb-Riis!
Des isch ä b'sunderi Riissort, die wu bii'm koche extrem stark z'sämme bäbbt. Den kriegt ma dann im Bambuskörli serviert, nimmt sich mit de Finger ä weng rüss, formt ä Kugel unn tunkt ihn dann in d'Soß oder d'Beilage.
Als "Snack" wird der dann oft in kurze Babusröhre ibber'm Kohlefiir g'kocht:

Des Bambusstück kann ma dann unterwegs uffrisse unn de Riis (meischtens ä weng siäß, wie unser Milchriis) rüss bibble. Ä umweltfreundlichi, praktischi unn landestypischi Verpackung, find ich!

Vun dem viele Riisschnaps, den ma däzüe trinkt, verzehl ich Eych lieber nix, meynt
De Bischemer

Die Remscheider kumme!

In minnere Siegener Zitt bin ich insg'samt drey Mol um'zoge. Erscht in d'Wg, Wu's mir jo echt güet g'falle het, wu aber nur dir ei Monat des Zimmer frey war. Dann vun de WG nooch Niederschelderhütte... (Ja, des heißt wirklich so. Unn genau so, wie's heißt, isch's au...! "Do, wu Fuchs unn Has sich güet Nacht sage!", hab ich immer g'sayt...!)
Entsprechend hab ich mir dann au schnell widder ebbis ander's g'süacht.
Ä Wohnung in de Stadt, damit ich des wenige, was in Siegen los isch, nit au noch verpass! Was dann de dritte Umzug worre isch.
Dass ich ä recht netti Wohnung in de Innestadt g'funde hab, war Glück. Aber luschtiger war des Erlebnis, was ich bii de Wohnungssüäch g'haa hab:

Uff ä Zittungs-Annonce hin hab ich mir ä Wohnung am Siegener Stadtrand ang'schaut. Es war am Samschdig noochmiddag, unn nur d'Doochter vun de Vermieter, so etwa in minnem Alter, war daheim . Uff de erschte Blick war klar, dass die Wohnung fir mich gar nit basst het: D'Badzimmerdiir war, zum Beyspiel, grad mol einsachtzig hoch. Also: Abg'hakt!
Aber mit dem Maidli hab ich mich uff Anhieb güet verstande. Darum bin ich de halbe Noochmiddag bii ihre bliibe, hab mit ihre g'schwätzt unn Kaffee trunke, unn nääbebey hämmer z'sämme die reschtliche Interessente an derre Wohnung "verarztet".
Uff eimol schreyt sie aber : "Die Remscheider kumme" unn stürmt d'Diir nüss...
Drusse isch tatsächlich ä Audo mit RS-Kennzeiche g'stande, unn üss dem sinn ä Handvoll Männer üssg'stiege unn dem Maidli um de Hals g'falle. Es ware alti Freunde, die kurzfrischtig uff B'süach kumme sinn.
Gliich isch de Üssgeh-Plan fir de Obend besproche worre, unn ich war automatisch mit däbii. So bin ich de halbe Dag unn d'ganz Nacht unterwegs g'sii, wu ich eigentlich nur mol schnell ä Wohnung hab anschaue welle.

Allerdings ware die Remscheider nit ganz uff minnere Wellelänge, unn des Maidli isch mir an dem Obend ä weng z'arg anhänglich worre. Darum hab ich denne Kontakt dann au ball widder iischloofe lehn.
Unn des war 's einzige Mol, wu ich bisher ibberhaupt ebbis mit Remscheider oder Remscheid als Stadt z'düe g'haa hab.

Ich däd unni Navi wahrschiins nit mol hin finde, gesteht
De Bischemer

D'Ortenau vun wittem (26)

Dass sich in Indie d'Lytt mit Farbbulver bewerfe, wenn de Frühling kummt, des het ma in Ditschland inzwische nit nur in de große Städt' mitbekumme. Jetzt fangt sogar Offeburg schun an, so ä "Holi-Feschtival" z'organisiere!
Ich bin jo ziemlich tolerant (oder sogar int'ressiert), wenn bii uns güeti Idee üss andere Länder unn Kulture ibbernumme werre. Aber 's git so ä baar Sache, die sott ma eifach dert lehn, wu sie herkumme unn historisch au hin basse. Des fangt, find ich, bii Halloween an, unn heert jetzt ganz konkret bii dem Farbbulver-Schmisse uff!
In Indie isch's wo wahrschiins ä wichtig's Symbol, dass alli Lytt, egal üss welchere Kaschte, an dem Dag alli gliich (bunt) sinn... Aber wenn des in Ditschland zelebriert wird, dann wird do eifach nur ä große, sinnentleerti, partymäßigi Sauerei drüss!

Ebber müäß die ganz Farb jo au widder weg buzze, grantelt
De Bischemer

Süachbegriffe zum Blog (14)

's isch Juni, unn Ihr ware so fleißig! Also kann ich Eych widder mol mit de "Top Ten" vun Eyre Süachbegriffe erfreue... Viel Spaß!

10. auguschte fährt mit frau (... hä???)
9. do häng min hez (vielleicht hesch Dich jo vertippt, unn 's soll "Herz" heiße??)
8. luftschutzbunker in titisee-neustadt (... do kann ich nit helfe!)
7. dicker po comic (... Wie wär's mit Donald Duck??)
6. verstucht-verband (... ich däd's mit Mobilat probiere!)
5. hochbeet hochbett (... kann ma schun mol verwechsle, isch mir klar!)
4. politisch korrekt ä nett's grüppli! (.. wenn ich jetzt ebbis Falsches schriib, verbrenn ich mir d'Finger!)
3. siegener mentalität (... au do sag ich lieber nix däzüe!)
2. keiheidi (... aber viellicht de Geiße-Peter?)
1. lukas liebt hello kitty (.. also DES weiß ich wirklich besser!)


... Unn de Summer kummt au endlich, strahlt
De Bischemer