Was wär wenn...

An Wiehnachte simma jo in Öschterreich, aber wemma daheim wäre, dann däd's wahrschienlich so ablaufe:


Wiehnachtsstimmung
Vier Kerze brenne uff 'em Disch
Will 's de viert Advent halt isch.
D' Adventskalender sinn schu' leer,
Schun lang gitt's kei Schok'lädli mehr!
Zum Kaffee frischer Epfelküache,
Unn Zuckerbredli zum versüache.
Orasche-Duft im ganze Raum,
Unn d'Lea strahlt zum Wiehnachtsbaum!

Unn isch es Heilig-Obend dann,
schaut jeder sinni Päckli an.
Ma schittelt, schniedet uff unn zupft,
De Rescht Babier wird abgerupft.
Was mir zwei kriege, isch nit wichtig,
Hauptsach, die Knepfli strahle richtig!
Vor Freid het keiner sich im Zaum,
Unn d'Lea zupft am Wiehnachtsbaum!

Dann spiele d' Kinder mit de Sache...
Was kinne G'schenk' fir Freude mache!
Sie renne hin, sie renne her,
Jetzt bremst sie wirklich keiner mehr!
Sie gigse, schreie, hopse rum,
Ihr ahnt es schun, glich keijt ebbs um...
De Lukas schnapp' ich noch am Saum,
Doch d'Lea kippt de Wiehnachtsbaum!

Na ja, es isch nix schlimm's bassiert,
Jetzt singe ma e Lied zu viert:
"Sankt Martin" isch de Favorit,
Okay, dann singe ma halt mit...
Mir "derfe" dann de Disch noch decke
Derwilscht die Kinder sich verstecke...
Des Feschttagsesse isch ä Traum!
"Lea, blieb weg vum Wiehnachtsbaum!!"

Dann endlich wird's daheim mol still,
Au wenn noch keiner schloofe will.
De Lukas schaut ä Büach noch an,
Unn hofft, daß er ball lese kann.
Sogar si' Schwester hert ihm züe,
Unn kummt so langsam au zur Rüe.
Ich strich' ihr zärtlich ibber'n Flaum,
Denn d'Lea schlooft am Wiehnachtsbaum!


Frohes Fescht, wünscht Euch
De Bischemer

Vorsorglich...

Uff de Berg sieht's jo im Moment gar nit so schlecht üss, aber die Vorhersage fir Wiehnachte sinn jo schun ehnder widder griän als wiss. Deshalb:

Warnung
He, Frau Holle, was isch los,
Wo sinn dinni Flocke bloß?
Isch an Wiehnacht alles griän
Wer' ma mit Dir schimpf miän!
Schneemann, Iis unn roti Nase
Well' ma nit vum Oschterhase!
Schnee uff uns'rem Wiehnachtsbaum,
Wär doch widder mol ä Traum!
Also los, jetzt zier Dich nit,
Daß es wissi Wiehnacht git!


... aber mir sinn an Wiehnachte jo eh in Öschterreich, do dirfte ma mit Schnee (bzw. Schneemangel) jo hoffentlich eh kei Problem ha, grins

De Bischemer

Rucksackurlaub

Jetzt hämma also de erschde Rucksackurlaub mit de Kinder vor uns... Ende Januar fliege ma nach Cuba, wu ma zwei-ä-halb Woche durch's Land reise welle. Vun Holguin im Süde bis nach Havana, vun dert fliege ma dann widder heim.
Klar isches spannend, wie die zwei Kleine 's Reise vertrage were, aber uff Cuba git's jo zum eine viel scheni Stränd zum sandspiele, und fir de Lukas ä Hüffe tolli Oldtimer zum anschaue.
Mir hänn vor, möglichscht oft mit'm Zug z'fahre, damit die zwei nit nur still uff'm Sitz hocke miän, unn ganz so viel Stazione wie ällei werre ma halt au nit anpeile kinne.
Aber wenigschtens isch des de erschte "echte" Rucksackurlaub, sither d'Sandra un ich uns vor sibbe Johr in Peru uff de Machu Picchu-Tour kenne g'lernt hänn.

Des isch echt mol widder Zitt wore, sinniert
De Bischemer

New York

Jetzt simma also mit'm Babba in New York g'si. Isi, Reini unn ich.


Des hämma ihm jo alli zum 70'schte Geburtstag g'schenkt.
Am Dunnerschdig simma hin g'floge, unn vom Hotel obends glich noch mol zum Times Square. Was fir ä Lichtermeer un Gewusel!
Am Friddig hämma dann ä Bootsrundfahrt um Manhattan g'macht, immer mit ä weng Nebel, aber zum Glück het's erscht am End zu'zoge.
Am Samschdig simma durch d'Stadt g'laufe, hänn Ground Zero, Wallstreet, Central Park unn so widder ang'schaut, un hänn obends s'erscht mol d'Spitz vum Empire State Building üss de Wolke rüslüege sähne (darum halt au "Wolkekratzer"...)
S'riesige Macy's Kaufhüüs isch jo direkt um d'Eck vun unserem Hotel g'sie, aber do drin kamma sich jo verlaufe, des war nit so ganz unser Ding...
Am Sunndig dann war endlich sunnig, also nix wie nüss uff d'Brooklyn Bridge, unn obends uf's Rockefeller Center, Top of the Rock.
Was ä geili Üssicht ibber die ganze Hochhieser, unn mitte drin s'Empire State Building... Mir sinn obbe bliebe bis es dunkel war, do het ma richtig tolli Fotos mache kinne.


Mändig dann noch mit'm Bus durch Uptown (Westside, Harlem, ...), dann z'ruck ins Hotel unn ab zum Flughafe, will obends de Flieger widder gange isch.

Des war's in Kurzform, nadierlich hämma noch viel Sache drumrum g'säne, nur des g'mietliche Beobachte vum New Yorker Alltag isch ä weng kurz kumme. Kamma bi'm erschte Besuch in so'nere Stadt aber wahrschienlich au nit erwarte.

Alles in allem hämma viel Spaß g'het, unn vor allem de Babba war hin un weg von dere Stadt...


Des war's Geld uff jede Fall wert, strahlt
De Bischemer

Kinder im Herbscht

Als Erwachsener het ma jo am Herbscht nit so viel Freid, do ärgert ma sich jo meh ibber Räge, Nebel un die kurze Dag... vun kalte Fiäß, allewil laufende Nase unn Erkältung gar nit z'rede! Aber Kinder sinn do ganz anderscht:

Herbschtfraid
Gibt's im Herbscht doch tolli Dinge:
Mit zwei Fiäß in d'Lache springe,
Kilowies 'es Lauf uffhebe,
Unn dann bunti Bilder klebe.
Dann noch ä Kaschtanie-Pferd,
Unn Kakao, noch warm vum Herd.
Epfel, Nuss unn Triebel satt,
Isch es windig: Ab uf d'Matt,
Unn de Drache stiege lehn...
Ach, isch's Kinderlebe scheen!

Manchmol sollt ma sich (im übertragene Sinn) eifach vun sinne Kinder anstecke lehn, grinst
De Bischemer

Herbschte

Jetzt im Herbscht fallt mir immer widder b'sunders uff, was fir Spezialbegriffe mir im Badische henn. Do bi uns in Rheinhesse sinn d'Winzer jetzt au widder aktiv, aber den Wortschatz von daheim hert ma do nit:
Es wird g'herbschtet (Triebel g'erntet), dann g'rätscht und entrappt (zerquetscht unn d'Stiel entfernt), in de Trott (Kelter) de Saft üspresst, damit ma hinterher de neje Siäße, Risser oder kratzige neje Wiin (je nach Vergärungsgrad) trinke kann...

Scheen, wemma sinni "Droge" im eigene Keller het, grinst
De Bischemer

Dscho Kocker

SWR1 macht im Moment bi uns Werbung mit dem Motto: "Ausgesprochen gut". Un 's allererschte Plakat, des ich g'säne hab het groß "Dscho Kocker" druf stehn g'ha.
Was hab ich g'lacht, will genau den Dscho Kocker macht d'Lea im Moment immer nooch. Ang'fange het's demit, daß sie D'Ärm, Hals un G'sicht verkrampft het, daß sie üssieht wie de Joe Cocker bi sinne Konzerte.


Unn will mir so g'lacht hänn fangt sie jetzt immer widder an, ruft "Dscho Kocker" und macht die Grimasse! Ich kinnt mich jedes Mol in 'd Eck schmisse!


De Lukas macht des jetzt au schon nooch (schiens sogar im Kindergarde), aber bi ihm sieht's irgendwie nur halb so luschtig üss.

Des sinn halt so kleini Highlights im Alltag, grinst
De Bischemer

Triathlon-Filmli

...hab ich üss Platzmangel g'löscht, wer sie will kann sich jo bi mir melde...

Die do gitt's:

Andi kumm üssem Wasser

D' Mutzels nooch de erschte Wäsche vum Johr

Seahorse, ä lebender Treibanker

Zwei Radler

Kai und Ralf am End (vum Triathlon)

Triathon-Groupie

Am Wocheend bin ich jetzt zum erschte Mol als "Groupie" bi unserm traditionelle Eberbacher Triathlon däbi g'si.
Sither de Kai un ich 1999 demit ang'fange hän hämma jo mit verschiede große Gruppe mitg'macht, ich glaub s'meischte ware mol sibbe Einzelni un ä Staffel. Vun de "Supporting Crew" gar nit zu rede...
Diesmol also war ich mit'm Lukas nur zum Anfeuere hing'fahre, un nadierlich het's am Samschtig obend mol widder g'rägelt. Aber dank Plane vor'm Bulli unn dichtem Zelt simma eigentlich nit naß wore.
Am Sunndig morge dann: Kalt, neblig, de Neckar braun wie immer... ich hab mir gar nit vorstelle kinne, daß ich des so oft mitg'macht hab.
Jedefalls hänn sich die vier Kämpfer (Kai, Ralf, Kjörn und Andi) dann (mehr oder weniger) tapfer g'schlage, un ich hab g'merkt, was fir ä Zuschauerstreß es isch, wemma in de Wechselzone rechtzittig alles fotografiere will und eigentlich gar nit zum frühstücke kummt ;-)
Aber schen war's! Vor allem, will dann doch noch d'Sunn rüßkumme isch, un mir nooch em Wettkampf g'mietlich grillt un g'veschpert hän.





Die sinn gar nit so schlimm, wie ich immer mach(...), grinst
De Bischemer

Peking-Oper

Jetzt war ich jo zwei Woche daheim bi de Kinder, damit d'Sandra au mol widder schaffe un ebbis anders sehne kann als nur Windle und Kindergarde.
Eins muß ma sage: Kei anderer Urlaub macht de Kopf so frei vum Büro-Streß, eifach will ma gar kein Zitt het, an ebbis anders z'denke.
Wie an dem eine Nohmittag, als die zwei plötzlich still in Lukas' Zimmer verschwunde sin. Schen, hab i denkt, kannsch mol ä Heftli durchblättere. Bis i de Lukas sage her: "Ha, schau mol, wie din Arm jetzt üssieht!"
Ich nix wie hin, un mich trifft ball de Schlag: Hänn die zwei ä Penaten-Dos g'funde, und de Lukas het de Lea s'Gsicht dick mit dere Creme i'gschmiert! Sie het echt üsgsene wie üs de Peking-Oper, so käswiss g'schminkt!
Trotzdem hab i sie erscht im Bett sitze lo (war jetzt jo eh egal), schnell Fotos gmacht un dann ab in d'Badwann. VIER mol hab ich de Lea d'Hoor gwäscht, bis des Zigs halbwegs druss war!
De Rescht war dann nur noch halb so schlimm, do defir git's jo ä Wäschmaschin.


Aber ma glaub nit, wie viel Bledsinn in den kleine Kepfli steckt, wundert sich
De Bischemer

Rothaus

Eigentlich hert sich "Rothaus" jo wie ä Mischung üss Badisch un Hochditsch an, sollt ma meine. Wemma an die Alternative "Rothuus" oder "Rathaus" denkt, also de Platz, wu de Burgermeischter sin Büro hett.
Iig'weihti (und des sin inzwischen au immer meh "Unsymbadische") kriege aber bi dem Wort "Rothaus" glich strahlendi Auge, will des de Name vun unsere badische Staatsbrauerei isch!
Un dene ihr "Tannezäpfli" isch inzwische schun in ganz Ditschland un driber nüß bekannt un begehrt! Vor kurzem hab i sogar in Italie ä Tannezäpfli-Schild annere Wirtschaft g'säne!
Was die Unsymbadische aber normalerwiis nit wisse, des isch de Name von dem Maidli uff de Rothaus-Flasche. Des isch nämlich die Biergit! Warum? Ganz eifach: Will si's isch, die's "Bier git"!
Wu anderscht hab ich au schun g'hert, daß sie "Biergit Kraft" heißt, abg'leitet vun dem philosophische Satz "Bier git Kraft"!


Wie auch immer, jetzt hab i Durscht, stüümt
De Bischemer

Italie

Jetzt simma widder üs'm Urlaub z'ruck. Vun Kärnte simma mol widder nunder g'fahre ans Meer, wenn au nit so lang. Mit kleine Kinder isch's Klima in Öschterreich eifach angenehmer als die Affehitz dert unde... Un trotzdem het Italie fir mich immer noch deutlich meh Urlaubs-Flair...!
Eigentlich ware ma jo in Caorle, de Name vom Nochbar-Ort klingt aber eifach meh nach Urlaub, find ich...:

Bibione
Heißer Sand un salzig's Wasser
(Nix fir unseren Wasser-Hasser...)
Muschle sammle, Burge baue,
Immer nooch de Kleine schaue...
Sunneschirm unn Isomatt,
Mann, wie macht die Sunn dich platt!
Nitt nur in de Mittagshitze,
Au noch nachts im Zelt kannsch schwitze!
Mortadella, Iis uf d' Hand,
Un dann nochmol an de Strand!
Des isch Urlaub, wie er soll,
Adria isch eifach toll!


Im Rückblick vagißt ma gern de Streß im Urlaub, weiß
De Bischemer

Kirscheblotzer!

Hmmm... Jetzt sinn jo langsam widder die Kirsche (oder wie de Badener au sagt: d'Griäse) reif, dann kamma endlich widder den leckere Küache mache: Kirscheblotzer!
Jeder hett wahrschienlich ä ander's Rezept, uff jede Fall sinn aber ganzi Herzkirsche drin (mit Stein), un Schokolad oder Kakao muß dezu.
De Rescht vum Rezept kann ma sich üssem Internet runterlade, unn ruckzuck kann ma den saftige, würzige, fruchtige, Kurz: De beschte Kirschküache vun de Welt esse!

"Ä güada" wünscht
De Bischemer

Hopp Schwiiz!

Kurz vor de Fußball-EM simma jetzt noch schnell in Urlaub in de Schwiiz g'si.
Des Berner Oberland mit dene hohe Berg un de Däler mit den Wasserfäll isch eifach wahnsinnig scheen!

Unter anderem simma mit de Zahnradbahn nuff uf d'Klei Scheidegg g'fahre, un vun dert widder runder g'wandert nach Grindelwald. Tausend Höhemeter bergnab, un des Ganze mit dem Luki in de Buckeltrage un de Lea im Kinderwage.
Entsprechend hämma am nägschde Dag au ganz scheen Muskelkater g'ha, aber g'lohnt het sich's uff jede Fall - vor allem, will ma an dem Dag so ä Glick mit'em Wetter g'ha hänn. Strahlender Sunneschiin, nit wie an de Dag devor un denooch widder diesig und drieb.
Un dert hämma eh Bern ang'schaut un ä Bootsfahrt g'macht, do war's nit so schlimm...


Wahrschienlich hämmer des scheene Wetter halt eifach verdient, strahlt
De Bischemer

Sardinie

Jetzt ware ma also ä Woch uff Sardinie. Un wie schen 's doch isch, wenn ma sich amenorts schun üskennt! Kei Sightseeing-Streß, kei Suche nach Supermarkt oder Café... Brucht ma au nit, wenn ma mit zwei Kinder eh schun g'nug z'organisiere hett.
Eifach morgens g'miedlich frühstücke, Kinder unn Spielsache inpacke un ab an de Strand! Dert sinn die zwei jo eh beschäftigt mit Burge baue, Sand schüfle un baggere, un Baba un Mama henn au mol ä baar Minute Zitt fir sich!
Mit Städtli bummle, Iis esse, Spielplatz un kleine Spritztoure mit'm Mietwage war die Woch au widder ruckzuck rum.


Aber soooooo erholsam, stüümt
De Bischemer

Erschdi Schritt...

So langsam fangt d'Lea an, ihri erschde Schritt ällai z'mache. Vor ä paar Däg het sie sich selber ä Paar rosaroti Schühli usg'sucht, unn mit dene stakst sie jetzt mol meh, mol weniger mutig durch 's Wohnzimmer. Nadierlich plumpst sie noch vielmol hin, aber do defir het sie jo die dicke Windle an. Quasi ä Airbäg am Fiedli :-)

Un wenn's dann klappt, daß sie ä paar Schritt witt kummt, dann gigst sie vor Freid! Nur wenn's schnell gehn soll (zum Beispiel will de Baba heimkummt), dann geht sie schnell uf d' Knie nunder unn flitzt los, will 's Krabble halt immer noch schneller geht als 'es Laufe...


Jetzt wird die Zitt mit Lea noch turbulenter, weiß
De Bischemer

April, April

Mol rägelts, mol brennt d'Sunn uff's Hirn
Mol schneit's, isch kalt, daß alli frier'n,
Ma merkt sofort, es isch April,
Der macht mol widder, was er will!
Ich will mich sicher nit beschwere,
De Herrgott macht's (in alle Ehre!)
Unn 's Wetter het wohl auch sin Sinn,
Zum Glück spuckt do de Mensch nit rin!

Vier Woche April hämmer noch vor uns, weiß vorsichtig
De Bischemer

Bobby Car

De Lukas fahrt mit 'm Bobby Car
Wie Evel Knievel, nur in klein,
Unn auch die Lea fangt schun a',
Zurück unn vor, un ganz allein.
Die beide rote Flitzer do
Die ratt're lütt uff de Terrass,
Vier Kinderauge strahle froh,
Ma sieht genau, des macht 'ne Spaß!

Endlich kamma widder in de Garde gehe un d'Kinder renne lehn, schnuuft
De Bischemer

Frühling??

Isches echt noch Mitte Februar, frogt ma sich, wemma jetzt iber d'Felder lauft??
D' Vegel pfiffe schun widder um d' Wett, unn d'Krokuss strecke ihri Köpfli mutig de Sunn entgege.
Sogar d'Hase hopse uff'm Acker schu widder wild um enander rum. De Frühling isch zwar noch nit wirklich do, aber wemma tief Luft holt, dann kamma schun rieche, daß de Winter verlore hett.

Bin mol g'spannt ob er sich nommol uffbäumt, sinniert vorsichtig
De Bischemer

Bettschlupfer un Betthopser

Isch des Wort "Betthupferl" jetz eigentlich hochditsch?? Egal, jedenfalls wird's au im Hochditsche verwendet... Wenn ich momentan aber bi uns daheim die Kinder anschau, dann sieh ich kei Betthupferl, sondern ä Bettschlupfer un ä Betthopser:
Fascht jede Morge, so zwische fünf un sechs, kummt de Lukas schtill un heimlich die Trepp hoch g'schliche, het meischtens noch de ganze Arm voll Kuscheltierli, unn steht bi mir nebe 's Bett. Wenn ich ihn dann hör lupf ich d' Bettdeck, un ohne ä Wort z' sage schlupft er bi mir ins Bett un schloft widder...
Die Lea, die wird im Moment allerdings meischtens zwische sechs un halb sibbe wach und hopst dann in ihrem Gitterbettli rum. Dezu ruft sie dann immer "Mama" oder "Baba" un freit sich wie ä Schneekönig, wenn einer vun uns zu ihr kummt. Allerdings isch sie dann oft au noch so mied, daß sie nur ä Schobbefläschli will, mit dem sie dann selber widder hinliegt un nochmol inschloft...


Was hämmer doch für liebi Kinder, strahlt
De Bischemer

Fasent oder was??

Geschtern war jetzt jo "Altweiber", wie's in Mainz un drumrum heißt. Bi uns daheim war des immer de "schmutzige Dunnschdig", unn genau wie die underschiedliche Name sinn auch die Tradizione im Alemannische ganz anderschd:
Erschtmol gitt's am Schmutzige de Hemmeglungere-Umzug, wu alli mi Nachthemde, Schlofkappe unn Ähnlichem rumlaufe und am Schluß Bohnesupp verteilt wird.
Dann sinn nadierlich die "Koschtüme" was ganz anders, tradizionell gibt's nämlich Häs un Larve. Des sinn die historische Narreverkleidunge mit g'schnitzte Holzmaske.
Unn die berühmt-berüchtigte alemannische Hexe sinn inzwische jo sogar im Mainzer Rosemontagszug ankumme :-)
Alles in allem isch die alemannische Fasent halt viel "uriger" als die Meenzer Fassenacht, aber trotzdem werre mer am Mändig groß feiere...

In dem Sinn: Helau (oder Narri Narro), ruft
De Bischemer

Kinderschul

Jetzt kummt unser Lukas also ball in de Kindergarde. Bi uns het des aber nie Kindergarde, sondern Kinderschul g'heiße.
An was ich mich noch am beschde erinnere kann, des isch des Kinderschuldäschli un die Trinkflasch, die mir do immer um de Hals hänge g'ha henn.
Des Däschli war üs Leder (glaub ich jedefalls) mit 'ere Schnall dran, do war dann immer des Veschperbrot drin. So ebbis wie Milchschnitte oder KinderPingui het's domols jo no'nit gäh!
Un minni Trinkflasch war üs wissem Plaschdig mit eme griene Becher als Deckel, die het ma mit 'nem griene Plaschdigbändel umhänge kinne.
Mmmmh, wie guet het immer der Apfelsaft g'schmeckt üs dem griene Becher!!

Ich bin jo mol g'spannt, ob de Lukas au so Erlebnisse mit'm Kindergarde verbinde wird, sinniert
De Bischemer

Ä stilli Woch', ällai daheim!

Strohwitwer
Ällei im Hüs, un keiner ruft,
's isch still unn leis', kei Miesli schnuuft.
Die Bubb schaut mich nur traurig an,
Kei Mucks macht Luki's Iisebahn.
Ä ganzi Woch' war keiner do,
Doch ball isch 's rum! Was bin ich froh!

Morge kumme mini "G'steller" us Öschterreich z'ruck, freut sich
De Bischemer