Silveschter

Es isch Johresend. Silveschter!
Unn so mancher ziägt Bilanz:
"War ich immer Schnellschter, Beschter?"
Doch was soll der Affetanz??

Denn was zähle die Pokale?
Wichtig isch, was wirklich bliibt...
Kumm zum Kern, vergiss die Schale!
Wichtig isch: Hesch g'lebt? Hesch g'liebt??

Nur nooch dem sollsch wirklich strebe!
Schau nach vorn unn ziäg ä Strich.
Leb es ganz bewußt, Din Lebe!
Denn am End geht's nur um Dich!


Ä güäter Rutsch ins neje Johr wünscht Eych
De Bischemer

Urlaubsimpressione, öschterreichisch

Geschtern war jo Stefanidag. Unn denne hämmer widder mol so typisch öschterreichisch-verwandschaftlich verbroocht:

Zum Frühstück mit Weckerl unn Marilleschleckli het's Milchkaffee gää (was uff'em lange 'ee' betont wird). Dänooch simmer in de Schnee g'fahre, wu d'Kinder ä weng Ski g'fahre unn uff'em Anfängerhang g'liftelt sinn.
Z'Mittag simmer in de Jausenstation iig'kehrt, dert het's Fritattensupp unn Topfenstrudel gää. Unn nadierlich minni geliebt Kaaspressknödelsupp!

Alsbald hämmer uns dann widder uff de Heimweg g'macht, zu Oma unn Opa.
D'Vierschanzetournee het noch nit ang'fange, sunscht wär de Fernseher uff Dauerbetrieb g'stellt g'sii... So aber hänn d'Kinder wenigschtens d'Chance g'haa, ihr Wiihnachtsg'schenk, ä DVD, anz'schaue.
Schnell war widder Zitt für noch ä Kaffee (... Ihr wisse, wie's üssg'sproche wird...) mit Mahlberger Schlossküache (vun mir) unn Kipferl (vun de Oma).

Im Wintergarde war grad noch hell g'nüe zum lese, aber nooch'eme Wiili war schun alles bereit fir's Fondue. Bis uff de Mage nadierlich - will Hunger hämmer noch nit wirklich g'haa... Aber egal, esse geht immer, schiint's!

Obends simmer - wie immer - zum Kartespiele zwangsverpflichtet worre - 'Stich ansage', wie üblich... Unn wie immer simmer vun "de Einheimische" abzoge worre. Was het sich de Opa g'freyt!

Alles also, wie sich's gheert, stüümt
De Bischemer

Wuanderscht g'lese (11)

Ach, Sardinie! Lieblingsinsel, fascht schun zweiti Heimät... !
Es wär mol widder an de Zitt, Dich z' b'süache! Nit nur ich, au d'Sandra unn die Kids stüüme sehnsüchtig, wenn sie an die Strände, Städtli unn all des andere denke!
De Wiihnachtsurlaub isch jo schun verplant, aber vielleicht finde mir an Oschtere noch ä Möglichkeit, endlich widder mol nooch Algero z'fliäge!?!

Unn in de Zwischezitt kann ich wenigschtens vun Sardinie draime! Uff de Websitt Pecora Nera ("Schwarzes Schoof") git's wunderbari Berichte vun de Insel: Vum Lebe, vun de Litt, vun de Landschafte...

Ich bin dann mol weg, z'mindescht im Kopf, verkündet
De Bischemer

Jubiläum

Ich hab grad bemerkt, dass der Blog am Mändig schun widder ä (gar nit mol so) klein's Jubiläum g'haa het:

De letschte Beytrag war de fünfhundertschte Artikel, wu ich g'schriebe unn veröffentlicht hab!
's het jo langsam ang'fange, aber in den letztsche vier Johr hab ich's tatsächlich g'schafft, im Schnitt jedi Woch zwei Artikel z'produziere. Unn wenn ich minni Notize so anschau, üss denne ich dann immer widder die Beyträg entwickel, dann sott au fir 2014 noch g'nüe Material iibrig sii!

Frohes Mitlese wünscht Eych
De Bischemer

D'Ortenau vun wittem (32)

Wie de Orkan Lothar an Wiihnachte '99 ibber de Schwarzwald g'fegt isch, des hab ich in Oberschopfe "live" mit erlebt. Eigentlich hätt ich an dem Dag ä Skikurs g'haa, aber der isch vorsichtshalber rechtzittig abg'sayt worre.
So bin ich an dem Morge mit minnene Eltere am Stubbe-Fenschter g'stande unn hab beobachtet, wie Äscht g'floge, Baim g'schittelt unn sogar Dächer abdeckt worre sin! Wenn mol de erschte Ziegel üss'eme Dach furt bloose war, dann het's fir de Lothar nadierlich kei Halte meh gää, unn des Loch im Dach isch immer größer worre.
Bii unserem Hüüs isch glücklicherwiis nix Gravierend's bassiert.

Uff de andere Sitt vom Hüss, üss'em Kuchifenschter nüss, het ma aber erscht recht die G'walt vum Lothar beobachte kinne. Dert sieht ma nämlich uff de Oberschopfener Wald. Uff eimol het ma g'sähne, wie sich d'Struktur vum Wald verändert, obbe uff de Ebene plötzlich die g'wohnt' Silhouette verschwindet unn wie statt Baim nur noch abg'risseni Baumstümpf stehn bliibe!
In de nägschde Däg hab ich dann ä Spaziergang in de Wald g'macht, unn do isch die Katastroph erscht richtig sichtbar worre! Ganzi Waldfläche ware umg'risse, d'Stämm ware wie vun'eme Riese in de Mitte abg'knickt, unn die Krone sinn krizz unn quer rum g'lege!

In de Zwischezitt ich des nadierlich uffg'rüümt, unn an den meische Stelle sinn neiji Baim 'pflanzt worre. Grad jetzt het de Förderverein berichtet, dass die Uffforscht-Aktione abg'schlosse sinn.
Aber trotzdem wird's noch manches Johr düüre, bis ma die Folge vum Lothar nimmi sieht.
De Lu wundert sich immer noch jedes Mol, wenn mir im Oberschopfener Wald jogge, dass an manche Stelle ä einzelner Baum dem Orkan 'trotzt het unn stehn bliibe isch. Do dävun (unn vun de Orkang'walt, die wu de Rescht vum Wald abg'holzt het) isch er jedes Mol schwer beiidruckt!


Sither dem Lothar hab ich au gröschter Respekt vor Sturm, bekennt
De Bischemer

Hit...

... uff de Dag g'nau vor zehn Johr hämmer g'hirotet!
Ich bin jo immer noch felsefescht ibberzeugt, dass des d'bescht Entscheidung vun minnem ganze Lebe war! Jederzitt däd ich's sofort widder so mache!

Aber dass es so witt kumme isch, war nadierlich erscht mol ebbis anders nötig: De Antrag nämlich...
Unn hitt präsentier ich Eych zu erschte Mol, wie des üssg'sähne het. So nämlich:

Ich hab mir extra ä halber Dag frey g'numme, denne Küache backe, verziert unn alles vorbereitet, bis d'Sandra obends heim kumme isch.
Ihr kinne Eych vorstelle, was des fir ä Iiberraschung war, wu ich die Tort präsentiert hab...

Dass sie z'erescht "oh, nei!", g'rüefe het, war nur dem Schreck g'schuldet. Do däfiir war 's "JA!" dann umso klarer!
Oder, wie de Janosch's in sinnere G'schicht "D'Tigerent unn de Frosch" verzehlt:

"FREILICH! Oh, sie hat FREILICH JA gesagt"

Do d'ribber frey ich mich hit, am zehnte Johrestag, b'sunders, weiß
De Bischemer

Bischemer Wiihnachtsmärkt

Jedes Johr am zweit' Advent
Merk ich, wie die Zitt verrennt:
Woran hab ich des bemerkt?
's war schun widder Wiihnachtsmärkt!

Mittedrin im Unterhof
Steht ä Kripp - mit echte Schof!
Rundherum die ganze Ständ,
Wie ma's halt vun Bischem kennt!

Gliich am Eck de Brootwurscht-Stand!
Also schnell ä Wurscht uff d'Hand!
Mit dem Wunsch bisch nit ällei -
Darum stellsch Dich brav in d'Reih!

Vorher müäß ä Glühwiin her,
Dann fallt 's Warte nit so schwer!
Iiberall "halli!" - "hallo",
's halbe Dorf isch widder do.

D'Kinder schleppe Nippes aa -
"G'wunne! In de Tombola!"
Endlich spielt de KMV...
Sag, wu isch denn minni Frau?

Klar, sie hockt am Grundschüälstand,
Selbschtgebaschtelt's in de Hand.
Sternli, Glöckli, Wiihnachtsschmuck...
's Portemonnaie sitzt widder luck'!

Schwätzli hier unn Schwätzli dert,
Wie es sich in Bischem g'heert.
Mit so viele nette Litt,
Do verfliegt ganz schnell die Zitt.

"Ah, Herr Noochber, au mol do!?"
"Lang isch's her, wie geht's denn so?"
Also: Hoch die Glühwiin-Tass,
Dann macht's erscht so richtig Spaß!

Irgendwänn, mit letschter Kraft
Hämmer noch de Abflug g'schafft,
Unn de Märkt geht langsam z'End...
So gehört de zweit' Advent!

Uff'em Weg zum Wiihnachtsfescht
Isch DER Wiihnachtmärkt die bescht
Iistimmung, die's fir mich git!
Chrischtkind, kumm! Ich bin so witt!



Noch ä scheeni Adventszitt wünscht Eych
De Bischemer

Käs unn Baguette

Immer, wenn mir nooch Oberschopfe fahre, dann kumme mir jo durch's Elsaß. Zum eine isch des eifach ä g'miätlicheri Strecke als ibber d'A5, unn zum andere kann ma do so scheen ä Zwischestopp iilege.

Des isch inzwische schun ä richtige Tradition worre: Sobald ma 's Grenzschild unn die Zollhiisli passiere, rüefe d'Kinder vun hinte: "Kinne ma im 'Super U' widder Baguette unn Käs kaufe?"
Nadierlich kinne ma des, unn will der Supermarkt gliich an de erschte elsässer Üssfahrt leyt, simmer au schnell dert. Also nix wie nii in de 'Super U'!
D'Kinder wisse schun de Weg zum Brotregal, wu ich mir ä frisch's Baguette unter de Arm klemmt. 's isch besser, wenn ich des Brot heb... (D'Kinder schlenkere sunscht so viel mit rum, dass in dere Brotgugg nur noch Brösel unn Baguett-Deig iibrig bliibe).
Also witter, in de nägschde Gang zum Käs. Mir wisse genau, was mir welle, es müäß de "Tomme d'Alsace" sii. Gern probiere ma dann immer noch ä anderi Sort däzüe, aber unni unsren Tomme geht gar nix!

Schnell an d'Kass zum zahle, z'ruck ins Audo unn los!
Küüm simmer durch de Kreisverkehr durch unn widder uff de Audobahn, schun müäß de Beyfahrer 's Baguett in Stückli risse un verteile. Vor lütter Gier däd jeder am liebschte vum Käs grad so abbisse, aber damit au jeder sinner Anteil bekummt, wird er vum Beyfahrer rationiert unn verteilt.

Bis mir gege Stroßburg kumme, isch der Proviant schun mit Stumpf unn Stiel verschlunge! Zum Glück isch's dann meischtens schun dunkel, damit ma nit sieht, was fir ä Chaos die Baguette-Brösel (b'sunders uff de Rückbank) anrichte...
Aber au des g'heer däzüe!


Unn d'Oma wundert sich dann, dass mir obends kei Hunger hänn, grinst
De Bischemer

Wuanderscht g'lese(10)

Achtung, bevor Ihr witter lese, will ich noch ä Warnung los werre: Falls Ihr schun vum Reisefieber ang'steckt sinn oder Angscht hänn, dass Ihr Eych anstecke kinnte, dann sotte Ihr besser nit uff de folgende Link klicke!

Bii www.reisedepeschen.de sinn nämlich zwei Sache ziemlich wahrschiinlich: Erschtens, dass Ihr ä g'hörige Zitt lang nimmi vum Bildschirm, vum Lese unn Bilder schaue, vum Draime unn vun derre Websitt wegkumme werre. Unn zweitens, dass Ihr möglichscht ball Urlaub nemme, ä Rucksack packe, ä Flug möglichscht witt weg buche unn abhaue welle!

Es isch echt unglaublich, was fir viehmäßig scheeni Reiseberichte do z'finde sinn! Nit nur die Reiseerlebnisse an sich, au de Schriibstil vun denne Autore isch sagenhaft!
Bii ä baar vun denne G'schichte (zum Beispiel Tanah Rata in Malaysia, Gibraltar oder Ushuaia uff Feuerland) bin ich noch länger hänge bliibe als sunscht schun, will die Berichte so viel Erinnerung hoch broocht hänn - ziemlich genau d'selbe Erfahrunge unn Iidrück hab ich nämlich dert selber g'macht!

Wie viel ma doch mit de Zitt vergisst, wenn man nit dribber redet!?!
Also dann, nemme Eych a baar Stunde Zitt unn fange an!


Aber sag nit, ich hätt Eych nit g'warnt, rüäft
De Bischemer