Montag, 8. August 2016

Uff de Lott

Ma sott's nit glaube...

Do wohn ich jetzt schun zwanzig Johr in Mainz, unn vum Lott-Festival hab ich noch nie ebbis g'heert. Unn däbii git's des Missigfescht grad hinter'em Flughafe Hahn schun etwa genauso lang....
Hätt ich nit am letschte Wocheeend grad mit'em Kai telefoniert, unn hätt er mir nit verzehlt, dass er widder mol "uff d'Lott" geht, dann däd ich hitt wahrschiins au noch nix dävun wisse!

So aber hab ich mir am Friddig ä Matratz in de Zafira nii baut, hab Schloofsack, Kühldasch, Bier, Proviant unn ä baar Klamotte däzüe packt, unn bin am Samschdig morge in de Hunsrück g'fahre!

Des war so ä toll's Wocheend! Müssig heere, in de Sunn leye, Bier trine, grille, babble, Lytt schaue - 's Lebe kann so scheen sii!
Aber 's Lott Feschtival ich au wirklich ebbis b'sunders. Alles friedlich, vieli Lytt bringe ihri Kinder mit ('s git sogar ä klein's Zirkuszelt mit Vorführunge fir die Kinder), unn alli hänn Spaß. Ich bin mir vorkumme wie bii 'ere Zittreis' in d'beschte Achtziger, mitte nii in ä d'Mittwochs-Arche-Party!

Aber schaue selber:






Ich bin mir ziemlich sicher, dass ich 's nägschde Johr widder "uff d'Lott" fahre wirr, wenn sich's irgendwie mache losst. Um die Zitt besteht nadierlich immer die G'fahr, dass mir grad in de Summerferie sinn, aber ansunschte isch des echt ä Wocheend, was ma sich nit entgeh losse sott.


B'sunders als alter Arche-Groupie, grinst
De Bischemer

Donnerstag, 21. Juli 2016

Schnoogeploog

"Was fir ä Summer", stüümt im Moment wohl fascht jeder...
Uff nix kann ma sich so richtig iistelle. Mol isch's kalt wie im Herbscht, dann wird's fir zwei, drey Dag so viehmäßig heiß, dass ma fascht ä Kreislaufkollaps kriegt, unn dann isch isch die Hitz au schun widder vorbey, unn's rägelt mol widder...

's einzig Konschtante an dem Summer isch die Schnoogeploog, hab ich's G'fühl...
Schun sither 'em Friähjohr sinn die Viecher so uffdringlich, dass ma nirgends ä Rüäh vor ihne het. Unn wege dem viele Rege, denne ganze Iiberschwemmunge unn Wasserlache iiberall, git's dies Johr g'fühlt hundert mol meh' vun denne Ploogegeischter als sunscht!

Was hämmer nit schun alles probiert, um sie los z'werre:
Nadierlich als erschtes die "Schnoogetablette" mit de Bakterie in jedere Wassertonn, damit irgendwänn die Bloog noochlosst.
Uff de Terrass brenne regelmäßig Citronella-Kerze unn Moskito-Coils, unn im Hüüs (hintere'em Schnoogevorhang) werre sie batscht, so bald ma sie sähne.
Angeblich solle die Viecher jo au de Geruch vun Tomateblätter oder Basilikum nit möge, aber bii uns het ihne des, schiint's, niemänds verrote!
Egal, ob mir im Garde (an de Tomate), uff de Terrass oder im Hüüs sinn, iiberall sirrt's in de Luft, unn ma isch nur am abwehre, druffhaue unn Stich kratze!

Was bin ich froh, dass ich wenigschtens nit so empfindlich uff die Stich reagier wie minne Frau oder minni Dochter: Bii denne schwill jeder Stich zu 'eme dicke Placke an, unn dass vieli vun denne dann uffg'kratz werre, kann ich verstehn...
Ob's wohl daran leyt, dass ich friähjer in Oberschopfe schun so viel vun de Schnooge versohlt worre bin? Aber dann miäßt's jetzt so langsam bii de andere au besser werre, oder nit?

Wie au immer, ich glaub, dies Johr kinne ma nur uff de Herbscht (unn de erschte Nachtfroscht) hoffe, damit die Ploog endlich ä End nimmt...


Oder halt unter'm Moskitonetz bliibe, räsonniert
De Bischemer

Montag, 18. Juli 2016

De SC in Oberschopfe

Jetzt het am Wocheend also de SC Freyburg in Oberschopfe g'spielt.
Dass do däbii de Bundesliga-Uffstiiger gege de Bezirksliga-Uffstiiger mit 7:0 g'wunne het, düät de Oberschopfener sicher nit weh... Unn au ich als "Exil-Oberschopfener" kann mit dem Ergebnis ganz güät lebe. (Ebbis ganz ander's wär's nadierlich g'sii, wenn statt 'em SC de VfB g'spielt het...)

Eigentlich wär des jo ä güeter Anlass g'sii, um mol widder nooch Oberschopfe z'fahre, aber diesmol simmer uff halber Strecke hänge bliibe. Mir hänn uns nämlich in Neustadt (an de Wiinstrooß) mit de Familie vun minnere Schweschter troffe, des war au mol ä richtig scheen's Wocheend...

Jetzt welle ma nur hoffe, dass die erschte Spiele vum SC Freyburg in de Bundesliga au so erfolgreich sinn, damit nit schun widder vor de Winterpaus des große Zittere unn Bange anfange müäß...


Ich druck de Düüme, weiß
De Bischemer

Freitag, 10. Juni 2016

Versicherungsfuzzi

Inzwische isch's schun ä Wiili offiziell:

Am nägschde Friddig hab ich minner letschte Dag bii "de Firma mit de drey Büachstabe". Dänooch kann ich noch zwei Woche Reschturlaub abfiire, unn am 1. Juli fang ich bii'ere große Versicherung an.
Allerdings nit als klassischer "Versicherungsfuzzi", sondern im Rechezentrum! (Macht jo au Sinn, als Verkäufer däd ich wahrschiins verhungere, wenn ich vun de Verkaufsprämie lebe miäßt...)

Wie au immer, des isch nadierlich ä ganz neyjer Lebensabschnitt, schließlich hab ich inzwische schun widder 16 Johr bii "Big Blue" uff'em Buckel!

Entsprechend glaub ich, dass ich Eych in Zukunft immer mol widder ä baar G'schichtli unn Neyjigkeite üss de Firma verzehle wirr kinne! Darum git's ab hitt au ä eige's Sammeltöpfli "Versicherungsfuzzi" - Schaue mol links in die Spalt', dert steht's...
Ich bin jetzt au schun kräftig dran, mir Noochhilfe mittels "Stromberg"-Episode anz'schaue... Was ä Spaß!!


Seye g'spannt, was bassiert, appelliert
De Bischemer

Montag, 2. Mai 2016

Uffstieg!

Ach wie scheen! Sither Friddig obend isch's sicher, dass de SC Freiburg 's nägschde Johr widder in de erschte Bundesliga spiele wird!

Nadierlich frey ich ich fir de SC, b'sunders nadierlich, will do dämit mol widder emol des vernünftige Verhalte in'eme Frofi-Füäßballverein honoriert wird.
Manch anderer Verein reagiert jo uff so ä Abstieg panisch, schmißt de Trainer nüss, kauft neiji Spieler unn "verschlimmbessert" dämit nur noch sinni Situation.

De SC het zwar nooch 'em Abstieg au wichtigi Spieler verlore, het aber wie g'wohnt neiji, jungi Talente integriert unn do dämit gliich Erfolg g'haa. Unn 's wichtigschte Zeiche vun Kontinuität isch nadierlich, dass de Christian Streich nooch'em Abstieg jetzt immer noch Trainer isch (unn sicher ä großer Anteil am Widder-Uffstieg het...)!


Jetzt bin ich nur g'spannt, ob mir uns nooch de Summerpaus vun dem scheene G'fühl verabschiede miän, dass de SC regelmäßig am Wocheend g'winnt... Des kann nadierlich gege d'Bayern, Wolfburg oder sogar de VfB widder ganz anderscht üssähne als gege Sandhause, Pauli oder Heideheim... Aber jetzt isch erscht emol "Nit abstiige" als Ziel 's Wichtigschte, denk ich...


Olé, olé, nur de SC, rüäft
De Bischemer

Donnerstag, 14. April 2016

Familie-Züewachs

Lang hänn d'Sandra unn ich uns dägege g'wehrt...
Ä Katz het's sii solle. Oder noch lieber ä Hund, aber des war vun Anfang an üssg'schlosse. Ä Hund kummt mir nit in's Hüüs!
Aber selbscht ä Katz als Hüüstier wär bii uns halt schwierig, wu mir doch alli Nas lang ä Wocheend, ä Woch oder sogar noch länger unterwegs sinn. Des hänn dann sogar unseri Kinder verstande (wenn au nit komplett als Argument akzeptiert...)

Vor ä baar Woche hämmer uns dann uff ä Kompromiss g'einigt: Meerschweinli. Mit dem Gedanke hänn mir uns alli vier anfreunde kinne.
Also isch's do dämit los'gange, dass mir 's Internet durchsüacht unn Erfahrungsberichte g'sammelt hänn.
Irgendwänn het d'Sandra dann erfahre, dass ä Bekannti üss Bischem ihr einzeln's Meeerschweinli los werre will. Was allerdings nit grad optimal isch:
's isch nämlich ä alt's, unkaschtriert's Männli, es kinnt also schwierig werre, ä jung's, zweit's Meerschweinli däzüe z'bringe.

Aber ma kann 's sich jo wenigschtens emol anschaue - hämmer denkt...
Dass die Kinder nadierlich, wenn sie so ä Tier erschtmol uff'em Arm hänn, des gar nimmer her gänn welle, war eigentlich klar...
Also bin ich geschtern oben uff'em Heimweg ang'rüäfe worre: "Kumm doch mol mit'em große Audo vorbey, dann kannsch gliich de Stall mitnemme...!"

Unn so hämmer sither geschtern ä neij's Familiemitglied:


Mir hänn uns uff de Name "Rocco" g'einigt.
Mol sähne, wie lang die Tierpfleger-Euphorie vun de Kinder ("Mir kümmere uns um 's füttere unn Stall butze!") anhalte wird. Ich bin jo g'spannt, ob sie bis züe de Summerferie durchhalte, bevor d'Sandra (wu schon dämit rechnet, dass es mittelfrischtig "Ihri" Meerschweinli sii werre) des ibbernemme müäß...


Aber erschtmol isch d'Begeischterung groß, weiß
De Bischemer

Mittwoch, 6. April 2016

Wuanderscht g'lese (28)

Hitt will ich Eych mol ä Projekt im Internet vorstelle, wu noch nit fertig isch:

Im Hochhüüs wird jedi Woch ä nej's Stockwerk däzüe 'baut. so wie do im niinte Stock:


Inzwische sinn's 26 Etage, unn wenn de Plan so funktioniert, wie's beschriebe isch, dann wird des Hochhüüs 's nägschde Johr im Herbscht fertig sii.
Interessanterwiis git's zwische so einige Stockwerg-Episode Verbindunge zu andere Stockwerk, so richtig interessant unn verständlich isch des Projekt also wahrschiins erscht, wenn's komplett fertig 'baut isch...

Ihr kinnte Eych jetzt also z'rucklehne unn sage: "Dann wart ich ebe bis nägschde September!", aber bis derthin hänn Ihr des Projekt ganz sicher schun widder vergesse. Also klicke lieber jetzt gliich denne Link an unn entscheide dann, ob Ihr in de nägschde Woche widder z'Bsüach kumme welle.


Ich wirr's mache, weiß
De Bischemer

Samstag, 26. März 2016

Audofahre uff sizilianisch

In de letschte Däg simmer fascht dausend Kilometer durch Sizilie g'fahre.

Z'erscht isch's ziemlich anstrengend, wenn nit sogar abschreckend, wie in Sizilie Audo g'fahre wird. Schun nooch de erschte Kilometer weiss ma, warum fascht nur aldi Audos unterwegs sinn,  unn warum so güät wie jedi Karre ann alle Ecke unn Ende verdellt unn verkratzt isch.

Aber wenn ma sich mol dran g'wöhnt het, wie's lauft, dann isch's gar nimmi schlimm.
Ma fahrt halt, wu Platz isch, basst gegesittig uff enander uff, unn wenn ma irgendwu durch will, dann fahrt ma so dittlich los, dass de Gegeverkehr 's au versteht. Dann haltet er nämlich (meischtens) au an. Ma müäß dann nadierlich au konsequent witter fahre, sunscht git's Chaos...

Wenn ma dann noch sinni Auge iiberall het, die ganze Moppeds im Blick b'haltet unn fir de Mietwage trotz allem ä Vollkasko abg'schlosse het, dann isch alles güät!

D'Badener sinn jo eh d'Italiener vun Ditschland, findet
De Bischemer

Freitag, 18. März 2016

Adé, Cleverle

Jetzt isch de Lothar Späth g'storbe.
Au wenn er ä Schwob war, so war er doch in minnere "Oberschopfener Zitt" de einzige prägende Minischterpräsident.
Vor ihm de Filbinger, denne hab ich nie wirklich wahr g'numme, do däfiir war ich eifach z'jung, unn Politk fir mich als Kind eifach unwichtig.
Nooch ihm de Teufel, denne hab ich dann fascht nur noch "üss de Ferne" erlebt, nooch zwei Johr im Amt bin ich eh vun Oberschopfe furt 'zoge. (Was nadierlich nix mit'em Erwin z'düe g'haa het).

Nit umesunscht het de Lothar Späth de Spitzname "Cleverle" g'haa. Ich däd mol sage, dass er ä ganz scheen g'höriger Anteil am wirtschaftliche Erfolg vun Bade-Württemberg g'haa het. Uff de andere Sitt het er's dann halt au widder ibbertriebe mit dem "Wirtschafts-Kuschle", sunsch wär er sicher nit anno '91 ibber die Traumschiff-Affäre g'stolpert.

Dass er enorm wichtig war fir Bade-Württemberg, des erkenne aber sogar sinni politische Gegner an. Nemme nur de jetztige Minischterpräsident, de griäne Kretschmann: Nur gäüti Wort ibber sinner Vor-Vor-Vor-Vorgänger, unn wahrschiins nit nur, will ma ibber Dodi nix Schlecht's sage soll...

Apropos Kretschmann:
Des hätt sich de Lothar Späth zu sinnere Politikerzitt sicher au nie vorstelle kinne, dass d'politisch Landkart vom Ländli emol so üssähne däd:


Aber hit geht's nit um d'Landtagswahl, sondern um d'Erinnerung an de Lothar Späth!


Fir mich war er einer vun de Güäte, sinniert
De Bischemer

Mittwoch, 9. März 2016

Kellerlabyrinth

Jetzt wohn ich schun fascht elf Johr in Bischem, unn insg'samt schun fascht zwanzig Johr in Rhoihesse... Aber bis letscht Woch hab ich noch nit g'schafft, mir endlich mol 's Oppenheimer Kellerlabyrinth anz'schaue...

Am Sunndig aber, endlich, war 's so witt!
's war so ä richtig's Aprilwetter, wu's quasi alli halb Stund zwische Regeschauer unn trockene Phase abg'wechselt het. Eigentlich het d'Sandra jo in de Frankfurter Zoo welle, aber do däfiir war 's Wetter halt echt z'grüüslig. Also bin ich uff d'Idee kumme, dass ma endlich mol des Kellerlabyrinth anschaue kinnte.
Schnell hab ich vier Tickets reserviert, unn noochmittags simmer uff Oppenheim g'fahre.

Jeder het ä Schutzhelm bekumme, unn z'erscht het de Stadtführer vor'em Iigangsdor ä weng vun de Historie vun denne Kellergäng verzehlt. Glücklicherwiis het er sich do dämit beeilt, will's in de Zwischezitt nämlich schun widder z'rägle anfange het.

Unn dann isch's endlich nii 'gange in de Untergrund! Ich war jo echt platt, wie groß unn witt verzwiigt die Kellergäng sinn. G'schätzti 32 km Gäng' solle angeblich unter Oppenheim leye, unn etwa ä Fünftel dävun isch noch gar nit entdeckt!
Bii derre Tour simmer aber nur so etwa 500 Meter witt spaziert, was aber bii dem ganze Zickzack, rechts unn links, nuff unn nunder schun g'langt het, komplett d'Orientierung z'verliere!



So ebbis Ähnlich's hab ich bisher nur uff de Interrail-Tour in Kappadokie (Türkei) g'sähne, wu d'Litt friähjer ganzi Höhlestädt' in die Tuffstei-Felse nii g'haue hänn. Allerdings ware die Höhl dert noch viel ursprünglicher (unn enger) wie in Oppenheim. Dertmols war ich froh, wu ich am End widder sicher üss de Höhle unn z'ruck am Sunnelicht war!

Falls Ihr also emol nit wisse, was Ihr am Wocheende triibe solle: Rüäfe bii de Touri-Info in Oppenheim an unn reserviere Eych Plätz bii de nägschd Tour durch de Untergrund!


's lohnt sich, versichert Eych
De Bischemer

Freitag, 4. März 2016

Fesseheim unn Wyhl

Hänn Ihr mitbekumme, dass es vor zwei Johr fascht ä Atomkatastroph in Fesseheim gää het??
Wenn ich denk, wie nooht des bii uns daheim isch, dann kann's mir grad angscht unn bang werre (obwohl des AKW Biblis jetzt au nit viel witter weg vun Bischem isch...)

Irgendwie isch mir bii derre Noochricht hit morge des Thema "AKW in Wyhl" in de Kopf kumme:
Ich war zwar zu derre Zitt, wu d'Kaiserstühler (unn anderi Badener, Elsäßer, Schwiizer unn so witter) gege de Bau vun so 'eme Atomkraftwerk am Kaiserstüähl kämpft hänn, noch so jung, dass ich mich nit aktiv für des Thema int'ressiert hab. Schließlich war ich do grad emol in de Grundschüäl.
Aber ich kann mich noch güät d'ran erinnere, dass ma in minnere Kinderzitt ziemlich oft die "AKW - nee!"-Uffbäbber uff de Audos g'sähne het.

Unn DIE Plakate hab ich au noch güät in Erinnerung:



Inzwische (unn fir die Erkenntnis hab ich sicher nit die Meldung vun Fesseheim bruucht) sotte ma doch alli verstande haa, dass Atomkraft nit wirklich hunterprozentig sicher kontrolliert werre kann. Unn wenn ma sieht, was däbii bassiere kann, dann sott ma echt schnellschtmöglich üssstiege!

Des findet z'mindescht
De Bischemer

Montag, 22. Februar 2016

Sturm in Oberschopfe

Am Wocheend war ich sither langem mol widder älley in Oberschopfe.
Samschdig morge. Im Wetterbericht isch Sturm vorherg'sayt. Ich wach uff, will de Wind an de Rollläde schittelt.
Sofort geht's Kopfkino los:

* Zapp * Wiihnachte 1999:

Zweiter Wiihnachtdag, Sunndig morge. Im Wetterbericht isch Sturm vorherg'sayt. Ich wach uff, will de Wind an de Rollläde schittelt. De Orkan Lothar het de Schwarzwald erreicht.
Mit minnene Eltere bin ich abwechselnd vum Stubbefenschter zum Kuchifenschter unn z'ruck g'wechslt, um z'beobachte, was bassiert:
"Jessis, schau mol, do fliägt ebbis durch d'Gegend!"
" Oh je, dert dribbe im Dorf sin d'erschte Dachziegel nunder keyt!"
"Schau mol, im Wald legt's jo richtig d'Baym um!"
"Herrje, jetzt fehle dert noch meh Ziegel, des Dach isch jo halber abdeckt!"
Was ware mir froh, dass bii uns am Hüüs nix bassiert isch! Aber die Schäde am unn im Wald kann ma bis hitt noch beobachte!

* Zapp * Z'ruck in d'Gegewart:

Jetzt am Wocheende isch zum Glück alles glimpflig üssgange. Kei Vergliich mit'em Lothar!
Ich hab am Sunndig sogar im Wald jogge gehn kinne, au wenn des Süüse unn Brüüse in de Tannewipfel sich manchmol schun ziemlich unheimlich ang'heert het...


Alles güät, berüähigt Eych (unn sich)
De Bischemer

Donnerstag, 18. Februar 2016

Esse im Urlaub (11)

Mit'em Kai bin ich emol sechs Woche lang durch Mexico 'zoge. Vun "ganz unte" in Cancun bis "ganz obe" in Tijuana, immer mit'em Bus von Stadt zu Stadt.

In derre Zitt hämmer oft selber kocht, meischtens Riis oder Nudle mit scharfer Soß. Zum Würze hämmer uns däfiir ziemlich am Anfang schun ä Flasch roti Chili-Salsa kauft. Des Ziigs war aber so scharf, dass schun ein, zwei Löffel dävun ä ganzer Topf Riis schärfer g'macht hänn als 'es meischte Esse vun de Einheimische! Mir hänn dann ang'fange, immer widder die Flasch mit Tomatesoß uffz'fülle, aber die Salsa isch irgendwie in denne sechs Woche nit wirklich schwächer worre, hämmer de Iidruck g'haa.

Typisch's Esse in Mexico ware aber (wie erwartet) Bohne in alle Variatione: Frijoles refritos, Bohne in Tortillas, Bohne zum Frühstück, Bohne, Bohne, Bohne...! Einmol hämmer sogar selber Bohne kocht: In San Cristobal de las Casas simmer nämlich an 'ere "Ein-Mann-Garage-Tortillafabrik" vorbey kumme, wu mir uns ä Kilo frisch 'backeni Tortillas kauft hänn. Do däzüe het's daheim dann nadierlich au Bohne (unn viel Zwibble) gää.

's leckerschte Esse, an des ich mich erinner, war aber Ceviche in Tijuana. Cheviche, des isch so ä Art roher Fischsalat mit Zitronesaft, Tomate, Chilies unn Zwibble. (Mir lauft jetzt schun widder 's Wasser im Mund z'sämme, wenn ich dran denk...!):
An unserem letschte Dag in Mexico hämmer noch emol Geld 'düsche miän, unn will de Kurs so unverschämt güät war, hämmer die ungeplante Pesos dann direkt verfresse. An so'eme Stroßestand, wu die ganze Einheimische g'esse hänn, hämmer uns dann ebbe so manchi Portione vun Tortillas mit Cheviche schmecke lehn, bevor mir mit'em Bus ibber d'Grenz nooch San Diego g'fahre sinn..


's Scheenschte am Urlaub isch halt oft 'es Esse, räsonniert
De Bischemer

Dienstag, 9. Februar 2016

"Abgeblosener" Rosemontag

So ebbis wie geschtern het Mainz noch nit erlebt!
Will fir de Rosemontag ä richtiger Orkansturm vorherg'sayt worre isch, hänn d'Verantwortliche de Rosemontagszug am Sunndig abg'sayt. Ma kann also tatsächlich sage, dass er im wahrschte Sinn "abblose" worre isch!

Nadierlich hab ich am Mändig trotzdem Urlaub g'haa, also hämmer daheim ibberlegt, ob ma nit doch nooch Mainz nii fahre unn Rosemontag fiire solle.
's war dann geschtern au ä richtig's Aprilwetter. Mol isch schier d'Welt untergange ("was ä Glück, dass ma daheim sinn...!"), dann het widder ä Stund lang d'Sunn g'schiine ("Jetzt miäßt ma in Mainz uff de Lu sii...!").
Noochdem ich immer widder im Internet 's Rege-Radar beobachtet hab, hämmer uns entschlosse, dass d'Sandra unn ich am fünfi obends doch noch in d'Stadt nii fahre. D'Kinder hänn kei Luscht däzüe g'haa, die hänn lieber daheim bliibe welle.

Also hämmer uns schnell verkleidet unn sinn nooch Mainz. Ä Parkplatz war erstaunlich schnell g'funde, unn au uff de "Lu" war viel weniger los wie sunscht. Klar, am Fastnachtsbrunne war Müssig unn Danz, aber 's war längscht nit so wie sunscht, wu schier d'ganz "Lu" vom Schillerplatz bis zum Theater voll mit Narre isch...

Etwa zwei Stunde lang hämmer danzt, ebbis g'esse unn 'trunke, ibber die ganze b'soffene Litt de Kopf g'schittelt unn 'em Sturm 'trotzt, dann war aber au widder güät.
Denne Rosemontag hämmer liäber daheim im Warme üssklinge lehn.


Ä richtig seltsamer Fasentsmändig, findet
De Bischemer

Freitag, 5. Februar 2016

Zombies, Run!

Ich jogg jo ganz gern durch d'Gegend, solang 's Knie mitmacht.
Normalerwiis hör ich do däbii selte Müssig, üsser wenn ich mich durch güäti Lieder noch ä weng meh motiviere oder ablenke will.

Kürzlich hab ich aber ä Prägrammli (ä App, also) uff'em Handy installiert, wu mich bii'm renne unterstütze soll: Die App heißt "Zombies, Run!"
Do däbii geht's um die G'schicht, dass ma als "Runner Nr. 5" in 'ere Siedlung lebt, wu d'Mensche mitte in 'ere Zombies-Welt existiere. Unn als "Runner" müäß ma dann üss derre sichere Siedlung rüss, um in verschiedene Missione entweder Proviant unn Material z'sammle, ebber z'rette oder d'Zombies vun de Siedlung abz'lenke...

So rennt ma also los, het d'Kopfhörer uff unn kann sinni Lieblingsmüssig anhorche. Ab unn züe kriegt ma dann "ibber Funk" Informatione üss de Siedlung, während ma so vor sich hin lauft.
Wenn dann plötzlich die Meldung kummt: "Warning! Zombies detected!", dann müäß ma sofort ä Sprint von etwa einere Minüt hinlege, damit ma vun denne Zombies nit erwischt wird. Je nachdem, wie schnell ma isch, heißt's dann entweder "Zombies evaded" (wenn ma sie abg'hängt het), oder "Zombies 50 meters.... 15 meters..." unn so witter (wenn ma z'langsam isch")...
Kinne Ihr Eych vorstelle, wie unheimlich so ä Zombie-G'schrey direkt hinter einem isch, wenn ma im Dunkle älley uff'em Radweg unterwegs isch???
Schau do, des isch ä Üssschnitt üss'em Laufprotokoll (Zitt pro Kilometer) vun minnem letschte Lauf - do sieht ma genau, wänn die Zombies hinter mir her ware, gell??



Wenn ma dann so ä Mission erfolgreich abg'schlosse het, dann kann ma in derre App mit de g'sammelte Gegeständ die Siedlung witter uffbaue. Quasi Sim City mit Laufkomponente...
Ihr sähne: Des isch ä echti Motivation fir so ä Intervalltraining.


Ä scheen's Wocheeend wünscht Eych
De Bischemer

Montag, 1. Februar 2016

Fischerdübel unn Fischertechnik

Jetzt isch also de Artur Fischer g'storbe...
Die Fischer-Dübel sinn nadierlich sinni berühmtschti Erfindung. Wer het nit selber schun alli verschiedene Größe vun denne Dübel in de Hand g'haa, unn wie viel Sache hänge nit in jedem Hüüs an Schrüübe, wu von solche Dübel abhänge??

Aber fir mich sich ä anderi Erfindung vun ihm viel prägender g'sii: 's Fischertechnik!
Ang'fange het's bii mir mit sibbe oder acht, wu ich minner erschte Kaschte Fischertechnik g'schenkt bekumme hab. Ich glaub, do git's sogar noch ä Foto dävun, wie ich an Wiihnachte denne Kaschte präsentier...
Später dann hänn minni Eltere aber ä Quelle bii Bekannte uffg'macht, wu mir die Stängli, Klötz' unn Motore nit orignalverpackt in Schachtle, sondern quasi als "Schüttgut" in große Kischte bekomme hänn.

Johrelang sinn die Kischte bii mir unter'em Bett g'stande, unn immer widder hab ich, ällei oder mit Kumpels, wildi Sache üssdenkt unn baut.
Ob's Fliäger, Audos, Roboter oder anderi Maschine ware, het kei Roll g'spiel - mit Fischertechnik hämmer alles hinbekumme!
Eimol isch sogar ä Do-X vun uns, des große Dornier Wasserflugzeyg, im Spielzeuglade in Friesene üssg'stellt worre...

Wenigschtens eini vun denne Kischte hab ich mit nooch Bischem g'numme, unn z'sämme mit de Kinder sitz ich immer noch ab unn züe dran unn bau ebbis.

RIP, Alfred Fischer! Dü warsch ä toller Erfinder, findet
De Bischemer

Donnerstag, 28. Januar 2016

De alte Fiat

Schun bevor ich uff de Welt war, het minner Babba ä Fiat 124 g'fahre.
Ich glaub, fir ihn war ä wichtig's Kriterium fir ä Fiat, dass de Fiat-Händler direkt in Oberschopfe isch unn ma sich im Dorf ebbe güät kennt. ('s isch zwar ä "Fiat Jäckle", aber nit wirklich mit uns verwandt...)

Komischerwiis isch de Fiat 124 üss'em eigentliche Nummerierungsschema vun Fiat rüssg'floge: Normalerwiis sinn jo die Typenummere bii Fiat größer worre, wenn's Audo größer war. Zumindescht war des immer min Verständnis.
Eigentlich war de 127er jo de kleinschte Fiat (vum Bambino mo abg'sähne). Aber immer, wenn ich verzehlt hab, dass mir ä Fiat 124 hänn, dann hänn mich die Litt g'froogt, wie mir mit sechs Persone in so ä kleini Kischt niibasse...
Däbii war so ä 124er echt ä Raumwunder!

Ganz friähjer hämmer denne Fiat 124 in so 'eme dunkle Lila g'haa- Hit däd ma wahrschiins "aubergine" däzüe sage.
Aber in de nägschde Johr (ich schätz mol, in Zitt, wu ich fünf bis siebzehn Johr alt war) hämmer noochänander zwei vun denne 124er in "laubfroschgriän" g'haa. Ibber die Zitt isch's fir mich so selbstverständlich worre, dass mir so ä Fiat-Kombi fahre, dass es ä kompletti Umstellung g'sii isch, wu de Babba später denne Dreyer-BMW 'kauft het...

Kinn Ihr Eych vorstelle, wie ich mich g'freyt hab, wu ich vor ä baar Johr bii'm Zelte am Bigge-Stausee so ä laubfroschgroäner 124er g'sähne hab, wu mit Uffbau zum Campingmobil üssbaut worre isch?



Okay, genau g'numme isch's eigentlich ä Lada, wu aber baugliich züe dem Fiat vun friähjer isch...


Ä Erinnerung an scheeni Kinderzitte jedefalls, räsonniert
De Bischemer

Dienstag, 19. Januar 2016

Jetzt isch aber mol güät!

Jessis nein, widder einer!
Jetzt isch au noch de Glenn Frey dod!

Kürzlich sinn jo de David Bowie unn de Lemmy Kilmister g'storbe. Unn im letschte Johr dann au de B. B. King unn de Ben E. King.
Au wenn de B. B. King de einzige vun denne isch, wu ich tatsächlich live g'sähne unn erlebt hab, so hab ich doch grad 's G'fühl, d'Müssiker, wu mich geprägt hänn, sterbe weg...

Wahrschiins isch des bii der Generation eigentlich au gar nit so verwunderlich, schließlich hänn die noch die "wilde Johr" in de Siebziger (plus/minus) voll mitg'numme, wenn nit sogar 'prägt.
Manchmol däd ich mir jo wünsche, ich wär ä baar Johr friähjer gebore worre, dass ich vun derre Zitt au noch ä weng meh' mitbekumme hätt.
Uff de andere Sitt hab ich aber dänooch noch g'nüe Zitt g'haa, um die Stimmung, die Müssig unn die Müssiker vun derre Zitt wenigschtens "g'filtern" noch genieße z'kinne.
ARCHE SEI DANK!

Also wirr ich hit obend ä weng vun de Eagles heere. Unn zwar nit nur "Hotel California", au wenn des zweifellos ä unvergleichlich's Stück isch!


Unn dann wird widder nach vorne g'schaut, verspricht sich
De Bischemer

Mittwoch, 13. Januar 2016

Bombe in Istanbul

Dass geschtern ä Bomb in Istanbul explodiert isch, wu sogar zwei Mainzer däbii umkumme sinn, hänn Ihr sicher g'heert.
Obwohl so ä Bombe-Anschlag generell schun schlimm isch, nimmt mich die Noochricht vun geschtern b'sunders mit. Schließlich isch unn bliibt Istanbul minni absolut Lieblingsstadt,
unn so ä Attentat in Sultanahmet trifft mich in minnene persönlichschte Erinnerunge.

Nit nur, dass ich die Gegend, wu des bassiert isch, in- unn üsswendig kenn unn schun dutzendmol selber dert lang flaniert bin...
Bii de Quasi-Hochzittsreis vun de Sandra unn mir nooch Istanbul vor zwölf Johr, do sinn dert nämlich au zwei Bombe an einem Dag explodiert!
Ich kann mich noch genau dran erinnere, wie mir grad in 'eme Tappichmuseum ware, wu ich uff'eme Fernseher die Noochrichte vun denne Anschläg g'sähne hab. Nadierlich hämmer dann beratschlagt, was mir mache solle, aber mir hänn dann schnell entschiede, dass mir trotzdem witter in Istanbul bliibe unn uns nit verstecke welle.

Unn ganz ehrlich:
Wahrschiins däd ich's hitt widder genau so mache. Uff de eine Sitt, will ma wahrschiins eh kei kompletti Sicherheit haa kann, unn die Wahrscheinlichkeit, dass kurzfrischtig noch emol ebbis bassiert, nur klein isch.
Uff de andere Sitt, unn des hab ich jetzt au schun ab unn züe mol als Kommentar im Internet g'lese, will ich nit, dass die Terrorischte unn Islamischte unser Lebensstil zerstöre unn uns zwinge, nooch ihre Vorstellunge z'lebe!

Unn trotzdem düät's nadierlich in de Seele weh, die schlimme Bilder üss Istanbul z'sähne!


Min Herz isch hitz'dag in Istanbul, bekennt
De Bischemer

Donnerstag, 7. Januar 2016

Gepäck-Tetris

Geschtern simmer üss unserem fascht schun traditionelle Wiihnachts-Urlaub bii de Oma in Öschtrich heim g'fahre. Unn wie üblich hämmer nadierlich widder (g'fühlt) de halbe Hüüsstand däbii g'haa.

Zum Glück simmer bii'm Packe schun so iig'spielt, dass 'es schun so ebbis wie Routine isch: D'Sandra rüümt 's Ziigs z'sämme, unn ich spiel Gapäck-Tetris:
Je nachdem, welli Form unn Flexibilität des Gepackstück het, wird's so lang drillt, druckt oder z'ruckg'stellt, bis alles iig'lade unn sicher im Audo verstaut isch.
Reisedasche, Klappboxe, Schüäh, Kühldasch, Spiele, Schlittschüäh, Jacke, Joggingsache, G'schenkli, Kuscheltierli unn -kisse, Proviant unn sither kurzem jetzt au noch Trompet, Saxophon unn Gitarr finde immer noch irgendwu ä Plätzli.

D'Sandra wundert sich dann immer, dass ich immer noch entspannt bliib, obwohl sie sich schun länger wundert, wu ich des ganze Ziigs ibberhaupt hin pack... Unn witzigerwiis bliibt dann, im Gegesatz zu so manch anderem Audo, wu mir uff de Fahrt sähne, dann d'Heckschiib noch frey, damit ma bequem nach hinte schaue kann.
Nur bii'm erschte Bremse, do merk ich dann, was mir dann doch alles widder mitg'numme hänn...

De Zafira isch halt echt ä Raumwunder, weiß
De Bischemer