's Geheimlabor

Vor Kurzem hab ich obends, wu ich heim kumme bin, noch de Lukas abg'holt. Der war nämlich mit sinnene Kumpels im Dorf unterwegs g'sii. Wu ich so uff'em Radweg Richtung Schüälspielplatz lauf, do kummt er mir schun entgege... Dreckig, im Pullover ('s war noch fascht Winter) unn mit de Schubkarre voll mit Schüüfel, Reche unn andere Gerätschafte.
Bii'm Heimlaufe het er mit dann verzehlt, dass sie in dem verwilderte Stück neben'em Spielplatz ä "Geheimlabor" baue. Die "Playmobil Top Agents" lehn scheen grüße...
Do däfiir miän sie nadierlich ä Feschtung baue, indem sie ä Loch buddle unn des mit Äscht, Stein unn Lehmbatze verbaue... Am liebschte wär ich jo z'ruck g'loffe unn hätt's mir mol ang'schaut!
Unn was war de Höhepunkt? Obends fallt ihm uff, dass er, schiint's, sin Kuscheltier am Geheimlabor verlore het, des wu er in de Hosetasch mitg'numme g'het. Also sin d' Sandra unn ich mit de Daschelamp los unn hänn g'süacht. Vun derre Feschtung hab ich im Daschelampeliacht nadierlich nit viel g'sähne...
Aber do schau her, am Baum nebe dere Baustell isch d'Jack vum Lukas g'hängt, die er zum Schaffe üsszoge unn dann vergesse het...! Glücklicherwiis isch in dere Jack au des Kuscheltier drin g'sii!

So findet sich alles widder, grinst
De Bischemer

Summerzitt

Sinn Ihr hitt au so k.o.?? Ich kann mich eifach nit an die Summerzitt g'wöhne...
Des war eigentlich schun immer so, aber dies Johr hämmer jo zum erschte Mol ä Schüälkind, also kinne ma nit eifach mol 's Uffstehn ä Weng nach hinte verschiebe. D'Schüäl fangt pünktlich an, do müäß ma halt uffstehn, ob ma will oder nit...
Ich kann mich noch erinnere, wie des war, als es in Ditschland noch kei Summerzitt gäähet, aber in Frankrich schun. Do sinn mir dann im Summer nibber ins Elsass (entweder nooch Barr zum Flammeküache esse, oder zum Städtli schaue nooch Riquewihr oder Ribeauvillé). Was het uns des dann immer verwirrt, wenn die Ühre dert dann ä Stund vor 'gange sinn... D'Läde hänn friäjer züe g'macht, d'Restaurants ware friäjer voll, unn d'letzscht Fähre het ma au noch verpasse kinne, wenn ma nit uffbasst het!
Unn wu's dann bii uns au Summerzitt gää het, do het minner Babba dann immer g'sayt: "Aber in richtiger Zitt isch es jetzt jo erscht..."

Dem geht's nämlich genau wie mir, weiss
De Bischemer

Radtour nooch Cuxhaven

Direkt nooch 'em Abi hab ich ä Fahrradtour quer durch Ditschland g'macht. Vun Oberschopfe bis hoch an d'Nordsee, nach Cuxhaven. In de Johre dävor hämmer zwei Mol Summerurlaub dert g'macht, unn mir het's dert immer güät g'falle. Darum hab ich entschiede, ällei mit'em Fahrrad dert hin z'fahre.
Witzigerwiis hab ich in de Woch vor'em Start in Lohr ä Klassekameradin troffe, unn die het mir verzehlt, dass sie grad in de selbe Zitt ihren Vatter in Cuxhaven b'süache wird. Also war die Froog nooch de Unterkunft au schun g'regelt :-)
Fünf Dag hab ich brucht bis ans Meer, unn viel hab ich däbii g'sehne vun de Heimat. Unn jede Obend hab ich bii Einheimische ä scheener Platz zum Zelte g'funde. Zweimol hab ich sogar im Gäschtezimmer schloofe derfe, will's nooch Rääge üssg'sähne het, unn Frühstück hab ich eigentlich au fascht immer noch bekumme.
Die Krönung war aber ä alter Büür obbe bii Münster, der mir bi'm Abschied mit 'em Spruch: "Nimm's, Dü kannsch's besser bruche als ich..." zwanzig Mark in d'Hand druckt het!
Die Tour het dertmols echt min Weltbild vun de Ditsche verändert... Nit stiff unn komisch, sondern herzlich unn hilfsbereit hab ich dii Litt kenne g'lernt!

Unn des war au de bliibende Iidruck vun dem Trip, weiss
De Bischemer

Furt g'sii

Ach, wu fang ich jetzt bloß an?
Eins um's ander war so scheen!
Fischmarkt, Michel, Reeperbahn...
Ja, 's kann nur um HAMBURG gehn!

Ich war mit de Sandra dert
Fir's verlängert' Wocheend!
Klasse war, wie sich's gehört,
Jeder einzelne Moment!

Mittags het uns' d'Elbe g'lockt,
Schiff' unn Schiffli schaue gehn,
Dann Sankt Pauli, wu es rockt,
Ach, was war des widder scheen!

Samschdigs dann nooch Blankenese
Zu de wirklich riche Litt!
Krizz unn quer mit'm Bus rum scheese,
Will's soo viel zum sähne gitt!

Speicherstadt unn Segelschiff'...
Nur die Elbphilharmonie
Bruucht halt noch de letzte Schliff
Dann will ich dert au mol hii!

Fisch in alle Variatione,
Alsterwasser, isch jo klar.
Eins weiß ich jetzt zweifelsohne:
Wu ich viel zu lang nit war!


Bis zum nägschde Mol düürt's aber kei zwanzig Johr meh, weiss
De Bischemer

In eigener Sach...

Wenn Ihr ab unn züä denne Blog b'süache, dann isch Eych wahrschiins uffg'falle, dass ich fir ä Wiili ä anders Design g'nutzt hab. Z'erscht hab ich denkt, des däd scheener üssähne, aber uff de zweite Blick war's mir dann doch eifach z'dunkel. Also hab ich noch mol ä weng dran rumg'schrüübt, unn so, wie's jetzt isch, g'fallt's mir doch besser.

Unn was meyne Ihr??, froog Eych
De Bischemer

Geburtstag

Am Samschdig hämmer Geburtstag g'fiirt. An Leas Geburtstag simmer lieber alli z'sämme ins Schwimmbad gange, aber so hämmer halt den Trubel am Samschdig g'haa.
Eigentlich ware sechs Maidli iig'lade, aber eini isch grad in Urlaub, unn ä anderi isch gliich widder heim, will's ihre nit güät 'gange isch. Sinn aber mit de Lea immer noch fünf kleini Göre bliibe, unn de Lukas däzüe.
's Mittagesse mit kleine Schnitzel unn Pommes war jo noch ganz erträglich. Aber schun bii'm G'schenker üsspacke isch de Lärmpegel g'stiege, unn wu bii de folgende Spiele nit jedi het g'winne kinne, do hänn schun d'erschte briält.
Mir hänn dann inn de Wiinberge noch ä Schatz versteckt, den sie hänn süache kinne, aber au dert het's Stritt gää, will nit jedes Maidli mindeschtens einen vun denne Zettel g'funde het, die wu ich versteckt hab.
Mit ä baar Spiele unn viel Schleck-Ziigs hämmer dann aber d'letscht Stund au noch rum kriegt. ('s däd mich nit wundere, wenn's de eine oder andere obends noch schlecht worre isch...)
Unn mit jedem Kind, wu abg'holt worre isch, isch es dann in unserem Hüüs widder stiller worre. Wie scheen, wu am End nur noch de Lu und d'Le iibrig bliibe sinn...
Puuh! Als nägschtes steht im Mai de Geburtstag vum Lu an, aber die Büäbe sinn jo eigentlich eifacher z'haa. Die kammer dann hoffentlich nüss in de Garde schicke, damit de Lärm sich besser verteilt :-)

Jedes Johr 's Gliiche, stüümt
De Bischemer

Palmenbadschnitzel

Hit obend geht's widder zum Schwimme. De Ingo unn ich. Inzwische sinn mir au richtig brav däbii, ibber de Winter hämmer uns fascht jedi Woch zum Schwimme 'troffe, unn vun anfänglich einem Kilometer (mit Pause zum Verschnüüfe) sinn mir inzwische bii zwei Kilometer Schwimmstrecke ang'kumme, unn des oft sogar unn Paus' durchg'schwumme!
Aber näbe de Fitness isch die Motivation däfiir eigentlich noch ä anderi: Bii dem Hallebad git's au ä Restaurant, des bietet richtig leckeri Schnitzel an! Unser Favorit isch es Palmenbadschnitzel: Ä paniert's Schnitzel, mit Schinke, Käs unn Spiegelei ibberbacke! Allerdings esse mir schun sither langem nur noch zwei halbi Schnitzel, statt zwei ganze... Glaube jetzt aber bloß nit, dass mir deshalb so ä Art Seniore-Teller bekumme! Die Schnitzel sinn so riesig, do lange ä halb's immer noch iibrig!
De Wirt kennt uns nadierlich inzwische au schun, unn so froogt er dunnerschdigs eigentlich nur noch sicherheitshalber nooch: "Zwei halbi, Knobitoast, ä dunkel's unn ä alkoholfrey's, richtig??"

Mir miän also nur noch nicke, grinst
De Bischemer

D'Ortenau vun wittem (16)

Achtung, strammstehn! D'Badener fiire 's Niinhundertjährige!
Dass mir jetzt halt "nur noch" ä Teil vun Baden-Württemberg sinn, des müäß ma jo nit unbedingt fiire (au wenn des dies Johr halt au grad sechs Johrzehnt lang düürt), find ich. Do hab ich ä weng ä anderi Meinung wie de Erbprinz es in dem Artikel beschriibt... Aber niinhundert Johr Badnerland, des isch doch mol ä Wort!


Vielleicht schaff ich's jo sogar mol, in dere Zitt au mol zü 'ere Fiir ins Badnerland z'kumme... Also nit vergesse: Am 27. April fiire ma alli Geburtstag!

Des isch doch ä scheeni Nachricht, findet
De Bischemer

Generalstreik in Bombay

Minner allererschter Flug ibberhaupt, der isch mit "Air India" nooch Australie 'gange. Des war ä G'schicht...!
Der Urlaub war während 'em erschte Golfkrieg. Air India het do offesichtlich Inder üss de Golfregion üssfliäge welle, darum isch unser Hinflug uff ä Lufthansa-Flug umbüächt worre. So witt, so güät.
Bii'm Rückflug sinn mir dann erschtmol mit Air India nooch Bombay g'floge. Was ä Unterschied zu Lufthansa...! D'Wänd sinn mit indische Figure tapeziert g'sii, alles het g'klappert, unn's Flugzeyg war eh nimmi s'Nejschte.

Aber richtig toll isch's erscht während dem Zwischestopp in Bombay worre. Mir hätte eigentlich Uffenthalt vun elf Ühr obends bis zwei Ühr morgens g'haa, aber um Mitternacht isch in Indie ä Generalstreik üssg'rüäfe worre... Unn so simmer uff dem Flughafe festg'hockt. Kei internationales Telefon (!), d'Sicherheitslitt hänn Wiin g'trunke, uff 'em Klo het ebber g'wohnt, der einem gege Geld ä Handdüäch gää het, unn iiberall war 's reinschte Chaos!
Ibber d'ditsch Botschaft in Bombay hämmer dann versüacht, ä Nachricht für daheim los z'werre, damit Kais Brüäder nit ummesunscht zum Frankfurter Flughafe fahrt, um uns abz'hole. Mir hänn ihm üssrichte lehn, dass er eifach mol acht oder zehn Stunde später losfahre soll. Ma het jo nit g'wisst, wie lang des düüre wird...

Irgendwänn morgens het sich dann zeigt, dass alli üssländische Flugzeyg starte derfe, wenn au mit Verspätung. Also hämmer so lang drängelt, bis mit mit Singapur Airlines (dertmols d'bescht Fluglinie ibberhaupt) nach London hänn fliege derfe, unn vun dert isch's mit 'eme kleine Propellermaschinli nooch Frankfurt 'gange! Unn was soll ich Eych sage: G'rad als mir in d'Wartehall g'loffe sinn, isch uns de Brüäder vum Kai entgege g'kumme... Was ä Timing!
Nur unseri Rucksäck, die sinn erscht zwei Dag später daheim abg'liefert worre.

Des war dann aber au egal, weiss
De Bischemer