Am Samschdig het d'Le ihren sechste Geburtsdag g'fiirt, unn so hämmer insg'samt zehn halbwildi Kinder im Hüüs g'haa. Unn fascht nur Maidli! Kleini, zickigi, lütti Göre... Wie Maidli in dem Alter halt sinn!
Z'erscht emol isch jo 's Wohnzimmer vor rosarote Farbe unn "Hello Kitty"-Bilder fascht explodiert, do dämit hab ich mich als Vadder vun'eme Maidli jo schun längscht abg'funde.
Aber dass d'Le schun so uffg'regt war, dass sie nachts nit schloofe het kinne, des hab ich eigentlich nit erwartet. Vor allem, will sie dann morgens am sechsi schun rumgeischtert isch, de Disch deckt unn uns g'weckt het! Happy birthday, oh Mann!!
So un-üssg'schloofe ware ma dann nadierlich perfekt uff denne Großkampfdag vorbereitet, kinne Ihr Eych vorstelle!
Unn wenn ich ehrlich bin, die Kinder ware eigentlich ganz brav. Jeder het sinni eige Pizza belege unn backe derfe (unn fascht alli hänn sie dänooch au brav uffg'esse). G'schenkli üsspacke geht eh immer güät, unn dann hämmer die Bagasch erscht mol nüss g'jagt in d'Rebe, zum Schatzsüache. Sie hänn sich üsstobt, ware b'schäftigt, unn hinterher het de Küäche au widder Platz g'haa. Nadierlich war's au ä "Hello Kitty"-Tort...
Dann hänn sie noch schnell Schmuck-Käschtli baschtle derfe (die Büebe halt als G'schenk fir ihri Mama...), unn am End hämmer noch Kino g'macht. "Karlsson vum Dach". So ware die Kinder alli handzahm, wu sie widder abg'holt worre sinn!
Unn mir hänn uns uff 's Kanabee g'legt, hänn d'Rüäh g'nosse unn uns geischtig schun uff de Geburtsdag vum Lu un zwei Monat vorbereitet...
Unn trotzdem war's scheen, weiß
De Bischemer
Keine Kommentare:
Kommentar veröffentlichen