D'Arche lebt!

Do schau her...!
Hab ich hitt doch tatsächlich ä email kriegt, dass ebber minni Websitt ibber d'Arche g'funde het. Unn die het mir verzehlt, dass es tatsächlich ä Facebook-Sitt "In Memory of Arche Waldkirch" gitt!


Unseri güät, alt Arche isch tatsächlich im Web 2.0 ang'kumme, däd ich mol sage...!

Des isch doch ä güäti Noochricht zum Wocheeend, findet
De Bischemer

Projektdag

Was sich alles ändert, wenn ma ä Schüälkind het...
Am Samschdig, zum Beispiel, war an de Grundschüäl Schüälfescht. Oder g'nauer g'sayt Präsentationsdag vun de Projekte, die wu d'Schüler in de Däg dävor g'macht hänn.
Vier Stunde hämmer Zitt g'haa, uns des alles anz'schaue (scheeni Sache ware däbii), mit andere Eltere z'schwätze (war fascht schun ä Dorffescht), vum Büffet z'esse (Schinkehörnli hänn mir 'bache) unn mit de Kinder z'spiele.
D'Erschtklässler, also au unser Lu, hänn des Thema "Zahlenraum" g'haa. Jedes Kind oder Kinderpärli het ei Zahl in'eme Schüäkartong präsentiert. Des isch die "Acht" vum Lu:

Ich bin jo mol g'spann, wänn er des Kunschtwerk mit heim bekummt, damit's bii uns rumsteht...

Mir miän irgendwänn anbaue, fürchtet
De Bischemer

Froh...!

Sither achtzehn Johr hab ich jo immer de selbe Anhänger an 'eme Lederbändel um de Hals. Es isch ä Modell vum aztekische Kalenderstein, den ich mir dertmols üss Mexico mitbroocht hab.
Unn geschtern obend merk ich plötzlich, dass der Anhänger weg isch! Panik! Hab ich ihn bi'm Jogge oder bi'm Radfahre verlore??? Jedefalls war er nimmi uffz'finde! :-(((
Ich hab mich richtig nackig g'fühlt, so unni des Ding!
Hit morge aber kummt de Lukas strahlend zu mir unn meynt: "Babba, schau mol, was ich do fir Dich g'funde hab!" unn hebt mir denne Anhänger samt Lederbändel hin. De Bändel war wohl g'risse, unn des Ding isch bii ihm im Zimmer zwische de Kuscheltiere g'läge!
Was bin ich froh!!!

Unn damit Ihr ä Vorstellung hänn, wie der Kalenderstein üssieht, hab ich do gliich noch ä passender Cartoon fir Eych (au wenn der zwische Maya unn Azteke ebbis durchenander broocht het...):


Genieße den Dag so wie ich, wünscht Eych
De Bischemer

"The Wall" im Kino

Fir ebber üss minnnere Generation (unn fir ä Pink Floyd-Fan wie mich sowieso) isch es jo fascht schun peinlich, aber ich hab erscht mit zweiezwanzig Johr zum erschte Mol "The Wall" vun Pink Floyd im Kino g'sähne!(Allerdings war des in de Achtziger jo au kei Film, der jedi Woch in 'eme Kino lauft, müäß ma däzüe sage...)

Jedefalls war ich dann also mit minnere dertmolige Freundin im Kino, unn die het denne Film au noch nit g'sähne g'haa.
Sie war ziemlich sensibel (au wenn sie's nach usse nit so oft zeigt het...). Unn "The Wall" het sie, schient's, ziemlich schockiert! Jedefalls het sie sich während dem Film immer feschter an mich g'klammert, unn immer, wenn ä Szene sie verschreckt het, dann het sie mich mit de ganze Hand in de Oberschenkel 'pfetzt, will sie sich so arg an mir feschthebe het welle!

Unn der Film het jetzt jo au grad gnüä Szene, wu ma sich verschrecke kann, find ich... Sogar hit find ich die G'schicht unn die Bilder vun "The Wall" noch ganz scheen uffwühlend. Aber körperlichi Schmerze, so wie an dem Obend, macht mir des zum Glück nimmi ;-)
Ganz b'sunders die Szene, wu plötzlich ä halbverwesti Leiche nebe de Müdder im Bett leyt, ich mir im Gedächtnis bliebe... Ich glaub, so pfetzt bin ich in minnem ganze Lebe noch nit wie do!


Ihr kinn Eych viellicht vorstelle, wie minner Oberschenkel am nägschde Dag üssg'sähne het, gell??? Ehrlich g'sayt hab ich nooch dem Film au die Platt "The Wall" ä ganz scheeni Zitt lang nimme heere welle...

Aber sither viele Johre isch des widder verfloge, weiß
De Bischemer

Sunndig morge...

Morgens, so um sechsi rum,
Ich drill mich grad nochmol rum...
Richtig wach bin ich noch nit,
Hör ich uff de Trepp die Schritt...

D'Lea schliicht sich zu mir hoch,
Alli and're schloofe noch.
Krabbelt schnell zu mir ins Bett,
Ach, wie isch der Sunndig nett!

Mit de Händli, klein unn zart
Streichelt sie min' Stoppelbart.
Unn als Antwort, richtig lang
Gib ich ihr ä Kuss uff d' Wang!

Stirn an Stirn, so eng ma kann
Leye mir unn schau'n uns an.
Hebe uns dann an de Händ
Unn genieße de Moment.

Üsem Augewinkel dann
Schau ich minni Sandra an...!
Unn trotz all der Schwärmerei:
D'Le bliibt immer Nummer ZWEI!


Ä scheene Sunndig wünscht Eych
De Bischemer

Rollerskates

Wemma hit "rollschüähfahre" geht, dann het ma jo normalerwiis Inlineskates an. Also die Rollschüäh mit vier Rolle hinterenander. Aber wu mir jung ware, do sinn jo Rollerskates in g'sii. Des ware die Rollschüäh mit 2 x 2 Rolle, unn nit mit'ere Brems' hinte an einem Schüäh, sondern an jedem Schüäh ä Stopper vorne dran.
Die Rollerskates hänn dann au kei feschter Stiefel g'haa, sondern sinn ehnder wie weichi, hochi Turnschüäh g'sii. Je poppiger, umso besser!
So langi Strecke wie mit Inlineskates isch ma mit denne jo au nie g'fahre. Höchschtens uff de Stroß hin un her, wobey des bii uns in Oberschopfe wege dem Berg schun ä echt's Kunschtstück war! Bremse het ma mit denne Stopper jo nur schwer kinne, wenn ma nit uff d'Schnytz keye het welle.
Unn dann het's nadierlich noch Roller-Disco gää, wu ma zu Disco-Müssig in'ere Hall het fahre kinne. So wie's hit manchmol noch Iislauf-Disco git.

Unn was hämma jetzt kürzlich im Urlaub g'sähne? Im verschloofenschte Kaff (Torrey in Utah, knapp 200 Iiwohner) simma zu 'nem Livekonzert vun 'ere Rockband 'gange. 's halbe Dorf war dert, will des wahrschiins ä ganz b'sunders Event g'sii isch. Unn die Bedienung dert isch tatächlich mit Rollerskates uff de Terrass rumg'saust unn het 's Trinke unn Esse serviert! Unn des unn ä einziger Unfall! Hüät ab!



So Rollerskates wäre au mol widder nett, findet
De Bischemer

Fascht wie Harald Töpfer...

Geschtern obend war ich widder mol jogge. Nooch'eme Wocheend in Oberschopfe isch den eifach notwendig, um wenigschtens ä Teil vun de uffg'nummene Kalorie widder z'verbrenne ;-)
Unn wie ich do im Dämmerlicht so ibber de Bischemer Radweg renn, do fliäge mucksmiislistill VIER Eule vunn hinte im Tiefflug ibber minner Kopf!

Ich bin mir vorg'kumme wie bii'm Harald Töpfer (oder, wie sinni englischsprachige Fans ihn au nenne, Harry Potter)... Ob die Vögel allerdings mit Briefli uff'em Weg nach Hogwarts ware, des kann ich Eych wirklich nit sage ;-)

Ä zauberhafte Woch wünscht Eych
De Bischemer

Kurztrip nach Amsterdam

Uff minnere letschte Interrail-Tour (nadierlich au widder nach Istanbul) war ich mit'eme Studiekolleg vier Woche unterwegs. Aber am End vun denne vier Woche, wu's Ticket gültig war, hämmer beidi heim welle zu unsere (dertmolige) Schätz. Also sinn mir am Friddig in Stroßburg iig'fahre (nach Ditschland het ma jo bii Interrail nit ummesunscht Zug fahre derfe), sinn abg'holt worre unn hänn 's Wocheend daheim getrennt vun enander verbroocht.
Aber des Interrail-Ticket war jo noch bis am Zischdig gültig. Also sinn mir am Sunndig obend mit'em Motorrad nach Stroßburg an de Bahnhof unn sin mit'm Nachtzug nooch Amsterdam g'fahre. Do hämmer zwei Dag lang noch ä Spaß g'haa, kann ich Eych sage! 's erschte mol in Amsterdam, unn des als zwei jungi Kerli! Zum Ibbernachte simmer ä baar Kilometer üss de Stadt nüss g'fahre unn hänn in 'eme Bahnhof g'schloofe. Des het aber dem Bahnhofspersonal nit g'falle. Die hänn uns immer widder uffg'weckt, will Schloofe im Bahnhof in Holland verbote isch...
Noch krasser war allerdings dann d'Heimfahrt am Zischdig obend. Do hämmer nämlich ä Zug mit Kurswage (git's des hitt noch??) nach Stroßburg unn irgendwo anderscht hin in Frankrich erwischt, unn sinn nadierlich im falsche Teil vum Zug g'hockt. Miäd, wie mir ware (denke an die vorherig' Nacht im Bahnhof...), sinn mir nadierlich ball iig'schloofe. Irgendwann binn ich dann uffg'wacht, will ich g'merkt hab, dass sich unser Waggon nimmi bewegt. Do war unser Teil nämlich schun vum Zug nach Stroßburg abg'koppelt! Also mir zwei, "uffg'weckt" wie mir ware, schnell unseri Rucksäck g'schnappt, üss'em Waggon g'hopst unn zur richtige Zughälfti g'rennt! Unn kurz nachdem mir nii g'hopst sinn isch de Zug au schun abg'fahre...!
Puh! Des wär ä G'schicht worre, wenn mir irgendwo in Frankrich uffg'wacht wäre, unn 's Interrail-Ticket wär abg'loffe...
So aber sinn mir kurz vor Mitternacht, also mit optimal üssg'nutztem Ticket, in Stroßburg ankumme!

Wildi Zitte ware des, räsonniert
De Bischemer

Schüälkind!

Jetzt isch es endlich so witt! De Lukas isch ä Schüälkind.
Hitt war Iischulung. Z'erscht ä Gottesdienscht, wie an so 'nene Dag üblich. Dann hänn d'Zweitklässler in de Turnhall fir unseri Kinder ä klein's Theaterstück uffg'führt, unn dänooch sinn die Kinder uff zwei Klasse verteilt worre.
Nachdem alli Schüälkinder in ihri Klassezimmer 'dackelt sinn het's fir d'Eltere noch ä kalt's Büfett gää.
Nooch 'ere Stund war de erschte Schüäldag schun rum. Mir hänn dann noch 's Klassezimmer anschaue derfe, unn des war's dann.


Mol schaue, ob de Lukas morge au noch so begeischtert isch vun de Schüäl wie hitt...

's wär ihm z'gönne, findet
De Bischemer

Meh ibber Wissrussland

Ich hab Eych jo noch ä Update üss Wissrussland versproche:
Zweimol simma letzscht Woch noch ibber's Land g'fahre.
Eimol vier Stunde mit'm Bus in de Süde (Bis 180 km vor Tschernobyl), nach Gomel, wu mir zu 'ere offizielle Fiir iig'lade ware.
D'Landschaft isch fascht iberall gliich, 's git nämlich fascht nix z'sähne. Do dävun aber ziemlich viel (grins). Städte sinn echt Mangelware.
Do fahrt ma fascht stundelang ibber ä schnürgradi Landstrooß, unn mit Glück sieht ma ab unn züä ä baar Hiisli am Horizont. Unn des sieht dann zum Beispiel so üss:


Wissrussland isch ziemlich flach, iberall sinn Wiese, Ächer unn Birkewälder. Grad die Wälder sinn ziemlich ufffällig, will ma so viel wissi Birke bii uns jo eigentlich nit sieht.
Witzigerwiis isch Birkesaft dert ä ziemlich normal's Getränk, mir hänn's sogar emol üss'em Tetrapack üssg'schenkt bekumme. Normalerwiis hole sich's die Litt aber direkt im Wald, indem sie im Frühling d'Birke anritze unn de Saft ufffange...

Am Samschdig ware mir uff de Privatdatscha vun unsere Partnerfirma (des war dann ä Zwei-Stunde-Fahrt in de Nordoschte...).
Ä Gelände mitte im Wald, mit eigenem See (riesegroß, mit Schilf, Seerose, Paddelboot unn krischtallklarem Wasser!), ca. 10 Containerhiisli unn russischer Sauna. Des war ä Spaß!


Z'erscht simma nadierlich in de See schwimme 'gange, dann Badminton, Bootli fahre, veschpere, unn immer widder Wodka... ächz!
Dann in d'russisch Sauna. Do wird kei Uffguss g'macht, sondern ma wird mit nasse Eiche- unn Birkebüschel abg'riebe unn abg'klopft. Des war ä echt's Erlebnis! Unn dänooch simma nadierlich immer widder zum abkühle in de See g'hopst!
Ä super Obendesse unn g'miätlich's Z'sämmehocke hänn de Dag abg'schlosse, unn nooch 'em Frühstück isch's am Sunndig widder zum Flughafe 'gange.

Echt ä super Trip, grinst
De Bischemer

Vermisst!

Oh Mann, geschtern hab ich erscht so richtig g'merkt, wie ich minni drey Schätz vermisst hab! Wu ich do am Bahnhof g'stand bin unn Lu un Le uff mich züä g'rennt sinn, do war mir klar, dass es nix Scheener's git! D'Lea isch vor Ung'stüüm sogar hin g'keyt, will ihr riesiger Rucksack sich bi'm Renne richtiggehend uffg'schaukelt het!
Unn dänooch. Was hänn die zwei mich unni Punkt unn Komma vollg'schwätzt, was sie alles erlebt, g'schenkt bekumme unn extra fir mich baschtelt hänn... Ich hab gar kei rechti Zitt g'haa, um d'Sandra z'begrüße!
Aber obends dann, nachdem ma d'Kinder erfolgriich in's Bett g'steckt hänn (Zitat Lea: "Ich will aber unbedingt bii Dir schloofe!"), do konnt ich dann au minni Frau genieße!

De scheene Alltag het uns widder, strahlt
De Bischemer

Wissrussland

So, jetzt bin ich also in Minsk. Unn ehrlich g'sayt isch die Stadt ganz anderscht als ich mir's vorg'stellt hab! Von wege "Oschtblock" unn rückständig...! Die Innestadt vun Minsk sieht üss wie sunscht irgendwu in Europa, nur noch süüferer als manch anderi Innestadt, die ich g'sähne hab. Unn die ganze Hiiser sinn tiptop erhalte oder ney herg'richtet. Alles in allem ä richtig scheeni Stadt!


Hitt fahre ma dann drey, vier Stunde ibber's Land nach Gomel, ä Provinzstadt im Süde. Do bin ich emol g'spannt, wie de Unterschied zwische Stadt unn Land isch...

Ich halt Eych uff'em Laufende, verspricht
De Bischemer

D'Amy isch dod!

D'Amy Winehouse isch g'storbe! Des isch echt ä Verluscht für d'Müssigwelt, find ich!
Jimi Hendrix, Jim Morrison, Janis Joplin, Kurt Cobain unn jetzt d'Amy... Alli viel z'friäj g'storbe, wahrschiins, will sie mit dem Erfolg nit z'recht kumme sin... DES wär ä geili Band im Müssigger-Himmel...
Amy, hoffentlich geht's Dir besser (oder sogar güät), do, wu Dü jetzt bisch!



Hätt'sch nur "Yes, Yes, Yes" zu Rehab g'sayt, seufzt
De Bischemer

Fascht wie Hannes Wader

Ich weiß jo nit, wer vun Eych ibberhaupt noch de Hannes Wader kennt... Ä alter Liedermacher und Klampfespieler, grad ä baar Dag jünger als minni Mama (sayt Wikipedia). Der war friäjer in de Siebziger politisch ziemlich aktiv.
Ich hab daheim au noch drey oder vier Platte vun ihm. Aber nur ä Sammelalbum, so verruckt war ich au nit nooch'em...


Unn 's einzig Lied, was mir vun ihm hänge bliebe isch, des geht so: "Heute hier, morgen dort. Bin kaum da, muss ich fort..."
Unn genau so geht's mir bzw. uns au grad. Jetzt simma grad zehn Dag üss Amerika z'ruck, unn schun ziägt's uns widder nüss in d'Welt.
Ich fliäg am Määndig fir d'Firma nach Wissrussland, nach Minsk. Unn will ma do sunscht jo nit so eifach hin kummt blieb ich gliich noch zwei Dag länger unn schau mir mit de Kollege dert ä weng 's Land an.
Unn will d'Sandra in dere Zitt nit mit de Kinder ällei daheim hocke will fahrt sie jetzt am Samschdig mit ihne eifach zehn Dag mit'm Zug nach Öschtrich zu de Oma...

Mir sinn halt so richtigi "Zigiiner", grinst
De Bischemer

Süachbegriffe zum Blog (5)

So, zwischedurck zeig ich Eych widder mol, dadd der Blog wirklich au im Internet lebt. Er wird nämlich vun
verschiedene Litt g'funde! Wobei ich manchmol schun d'ran zweifel, ob die Litt tatsächlich "mich" g'süacht hänn...
Aber schaue selber:

10. die fra lerch in de kerch (nit, badisch, sondern pfälzisch, aber immerhin...!)
9. zwei wahle (...ob der des selbe meynt wie ich??)
8. gedichte für kindergeburtstag kos (... was het des mit enander z'düä??)
7. musketier karamellzopf (... lecker!)
6. fiat hänn (... frooge mich nit, ich weiß es au nit!)
5. spiderman 4 schildli (...hä???)
4. des ware noch zitte (... wem sagsch des...!!)
3.fufzig langi johr sin rum (... der süacht ä badisch's Geburtsdagsgedicht, schiint's mir...)
2. milieu hausach halb 1 (... git's um die Zitt ebbis B'sunders??)
1. des lebe isch nid umsunscht (... wie wohr!)


Ä scheeni Woch wünscht Eych
De Bischemer

Umg'stellt!

Oh wie scheen! Die Kinder sin widder in de ditsche Zitt ang'kumme!
Bis geschtern noch sinn Le unn Lu friäj morgens wach worre. Am Sunndig isch d'Lea schun um drey bii uns im Bett rumturnt unn het g'froogt: "Wänn kinne mir endlich uffstehn unn frühstücke...?"
Unn geschtern morge hänn die zwei um halber fünfi "Bob de Baumeischter" im Cassetterecorder voll uffdrillt, dass mir fascht üss'em Bett g'floge sinn! ÄCHZ!
Aber hitt morge ich d'Lea grad wach worre, als ich uffg'stande bin, unn de Lu hämmer sogar wecke miän! Unn wie ich die zwei kenn werre sie sich jetzt ball schun widder zu de g'wohnte Morgemuffel entwickle...

Vor allem, wenn de Lu dann in d'Schüäl kunnt, nickt
De Bischemer

Was bliibt?

So schnell sinn also drey Woche Urlaub rum. Unn was bliibt?
Als erschtes nadierlich die fascht genau 2000 Fotos! Okay, fir ä Urlaubsvortrag ä weng viel, do müäß schun ä "Best of" g'macht werre.
Aber des isch halt uff de andere Sitt de Vorteil, wenn ma ä Fotografin zur Frau het. Ich hab mich echt nit drum kümmere miän, die ganze tolle Landschafte uff'eme Bild fescht z'hebe oder mir Gedanke mache, wie's hinterher am beschte wirke kinnt. Ich hab eifach nur d'Üssicht genosse, während d'Sandra d'Fotos g'macht het.
Okay, ich hab nadierlich au die Kids bändige miän, wenn des mit'em Fotografiere mol ä weng länger düürt het. Aber des war's wert!


Unn wenn ich g'froogt wirr, was denn jetzt des Beschte am Urlaub war, dann kann ich nur sage: 's gitt kei einzelner Ort, der wu "'s Beschte" isch, sondern die unglaublich' Abwechslung, mit Schneeberge, rote Felse, Wüschte, Städtli unn Großstadt isch des, was am End im Kopf bliibt!

Unvergesslich, der Urlaub, findet
De Bischemer

Geburtsdag

4. Juli... Hit hesch Geburtsdag, Amerika (oder besser: USA). 235 Johr alt bisch worre.
Eigentlich hesch Dich ganz güät g'halte. Aber wenn ich dann widder denk, dass Dü jetzt grad mol doppelt so alt bisch wie "unser" Johannes Heesters, dann bisch Dü fir ä Land jo au noch ä rechter Jungspund... Froog uns emol, wie alt zum Beispiel des vun Dir so geliebte Heidelberg isch... :-)


Zum Urlaub mache bisch Dü jo richtig scheen, aber länger lääbe wott ich jetzt doch nit do. Do däfiir isch mir dinni "Kultur" eifach in viele Sache z'komisch...

Jetzt noch nach Las Vegas, unn dann heim, stüümt
De Bischemer

Rocky Mountains pur!

Eigentlich hänn mir jo im Rocky Mountains National Park ibber de höchschte Pass fahre welle. Aber der isch g'sperrt g'sii, will ä Sturm in de Nacht dävor z'viel Neyschnee broocht het. Also sinn mir halt ä anderer Weg drum rum g'fahre.
Aber hitt simma dann spontan uff de "Loveland Pass" nuff g'fahre. Der isch mit 12.000 Fuss zwar ca. 500 Meter niedriger als der andere, aber trotzdem wahnsinnig toll! Unn wie sich die ganze fette amerikanische Trucks do nuff (unn vor allem widder nunder) g'quält hänn, des war echt ä Spektakel, kann ich Eych sage!


Unn wie Ihr sähne isch's Wetter inzwische au widder wie sich's g'hört, die Schneeberg' zeige sich im beschte Sunneschiin!


Ä scheeni Zitt in Ditschland wünscht Eych
De Bischemer

Denver

Geschtern sinn mir also nach Denver g'floge. Mensch, des war ä Odyssee...!
Immerhin hänn mir die Ewings (vun "Dallas") unn die Carringtons (vom "Denver-Clan") an einem einzige Dag b'süache kinne :-)
Hitt hämmer uns Denver ang'schaut.


Des isch ä netti Stadt, aber uns triebt's nüs in d'Natur! Morge geht's in de Rocky Mountains National Park.

Also dann, des langt fir's Erschte... Ich bin miäd, de Jetlag ploogt!

Bis bald, gähnt
De Bischemer

Endspurt

Jetzt kann's dann so langsam losgehe in Urlaub...! Noch anderthalb Dag, unn d'Vorbereitung isch güät im Plan...
Am Wocheend hab ich drey Schüssle voll Hanstriibili 'zopft unn zu Saft verkocht, d'Tomate sinn an'bunde, unn alli Bekannte hänn de Ufftrag, sich Salat üss unserem Garde z'hole. D'Johanna üss de Noochberschaft wird de Garde gieße, unn wenn Ziigs reif wird (d'Stachelbeere sinn kurz dävor), dann soll sie's mitnehme.
S'erschte Motel (in Denver) isch reserviert, de Mietwage au. Zugverbindung zum Flughafe isch rüssg'süacht, nur 'packt hämmer noch nit. Des het aber au noch Zitt, bii uns geht des immer ziemlich schnell. Wichtiger isch: Uff de Laptop hab ich ganz viel Kinderfilme g'spielt, damit Lu unn Le denne lange Flug halbwegs güät rum bringe!
Morge obend isch de Lukas jetzt üüg'rechnet noch uff'em Kindergardeabschluss-Übernachtungsüssflug, do müaß ich ihn dann halt kurz vor Mitternacht abhole. Schad fir ihn, aber wenn ma do däfiir nach Colorado fliege därf, dann isch des okay, denk ich...


D'Spannung stiigt so langsam bii de ganz Familie, aber gegenüber de Lea miän ma ganz "cool" bliibe, nit dass die widder vor Reisefieber krank wird, wie d'letschte baar Mol...

Aber noch sieht's güat üss, meynt
De Bischemer

D'Ortenau vun wittem (10)

In Oberschopfe het de Johrgang 1941 Klassetreffe g'haa. Unn do isch ä üssg'wanderter Oberschopfener, de Rudolf Jäckle, extra üss de Karibik iig'floge!
Okay, "Jäckle" isch jetzt in Oberschopfe nit grad ä ganz seltener Name, aber wenn ich lies, dass des de Cousin vum jetzige Burgermeischter Michael Jäckle isch, dann miäßt der Rudolf Jäckle sicher au (wenn au ibber mehr als ä baar Ecke) mit mir verwandt sii...! Wahrschiins ä Groß-groß-großonkel vun mir oder so...
Aber unseren Oberschopfener Stammbaum hab ich mit denne ganze Sitte-Äscht nit im Kopf, do miäßt ich bii Gelegeheit emol minni Eltere frooge, wie des genau isch...

Curacao, heert sich güät an, findet
De Bischemer

Marburg!

Wow, was fir ä Wocheend!
Erscht de Doppelfiirdig (Vaterdag unn Geburtsdag), unn dann am Friddig ab nach Marburg!
All die liebe Litt sinn kumme, nur de Ralf het sich als Üssred lieber ä Urlaub in Bali uff denne Termin g'legt... Drückeberger!
Glück mit'm Wetter hämmer g'haa, 's meischte vun dem G'witter am Samschdig obend isch um uns rum 'zoge. Mir sinn eigentlich fascht komplett trocke bliebe... vun usse...! (Üsser, dass de Lukas mich mitsamt de Svenja in d'Lahn g'schuckt hett, aber an dem Bledsinn war ich eigentlich selber schuld!)
Vun inne war's eh widder ä typisch's Bigge-Revival, do kann vun trocke kei Red sii. So isch's halt, wenn die Truppe z'sämme kummt!
Dass de Campingplatz direkt an de Bahnlinie leyt, wu d'ganz Nacht Güterzüg durchfahre, des war dann eigentlich au nimm so schlimm. Mir hänn alli verhältnismäßig güät g'schloofe. Au wenn's bii manchem viellicht doch ehnder ä Koma als normaler Schloof war :-)

's nägschde Johr widder, weiß
De Bischemer

Rege!

Schun sit' viele Woche lang
Warde mir uff Rege bang'!
Geschtern aber, liebi Litt,
War's dann ENDLICH an de Zitt:
Regewolke, dick unn schwer,
Zoge ibber Bischem her.
Scheeni, feschti Regeschauer,
Wenn au nit vun langer Dauer...
Des geliebte H2O,
Wie isch do de Garde froh!
Ach, was war de fir ä Wonne,
's Plätsch're in de Regetonne!
Unn de Rase, richtig nass,
Macht grad noch mol so viel Spaß!
Aber hit, wie isch des dumm,
Isch es grad schun widder rum.


Aber de Anfang isch g'macht, strahlt
De Bischemer

D'Grashüpferinsel

Immer mol widder, wenn ich an minni Kinderzitte in Oberschopfe z'ruck denkt hab, dann isch mir ä Fernsehserie in de Kopf kumme. Unn jetzt, in Zitte vun Internet unn Amazon, hab ich die Serie uff DVD g'funde unn gliich kauft. Es isch "D'Grashüpferinsel".
Do haue drey Büäbe in England vun daheim ab, will ihne so viel stinkt. Hüüsuffgabe, Hoorschniide, Gutnachtküsse unn so widder... Sie lande dann uff'ere (so glaube sie wenigschtens) unbewohnte Insel unn hänn ä Mordsspaß.


Uff dere Insel wohnt aber au noch de Mr. Button (ä Grashüpferforscher) mit sinnere Hüüshälterin, unn die hänn nadierlich au kei Ahnung vun denne drey Mitbewohner...
Unn was die drey Büäbe do erlebe (unn wie sie dann de Mr. Button treffe), des schaue sich jetzt au minni Kinder noch gern an. Do bassiert zwar nit wirklich viel in denn Episode, aber ich glaub, fir Lu unn Le isch des eh viel ang'nehmer als so verruckti G'schichte, wie sie hitt oft im Fernseh laufe...
De Produzent vun dere Serie het übrigens au "Catweazle" g'macht... Unn wer DEN nit kennt, der het eh in'ere andere Zitt g'lebt als ich!

Viellicht kummt der jo widder mol im Fernseh?, hofft
De Bischemer

Hit vor sechs Johr...

... do hab ich zum erschte Mol minner Büä im Arm g'haa! 's am Fronleichnams-Dunnerschdig, unn morgens kurz nach zehn, do isch der große, aber doch noch so kleine Büä isch endlich uff de Welt g'sii!
Oh Mann, sogar jetzt wird's mir widder ganz anderscht, wenn ich an denne Moment z'ruck denk! So ä Mischung üss Freyd, Stolz unn eifach nur Glück, Glück, Glück! Des kann keiner verstehn, der den nit schun selber erlebt het!


Unn hit isch de Lukas so ä großer Kerli, kummt ball in d' Schüäl unn fiirt mit sinnene Freunde ä "Spiderman"-Geburtstagsparty!

Alles Güäte, Lukas, wünscht
De Babba, äh, de Bischemer

Frühstück uff Perserdeppiche

Bii minnem erschte B'süach in Istanbul (do, wu ich au die zwei Maidli kenne g'leert hab), do hämmer uns au mit'eme junge Deppichverkäufer in de Nähdi vun de Blaue Moschee ang'freundet. Der (ich glaub, er het Hakan g'heiße) het uns dann jede Morge zu 'eme Glas Tee iig'lade. Des isch bii türkische "G'schäftslitt" jo erscht mol noch nix B'sunders. Aber mir (der Amerikaner unn ich) hänn dann immer ebbis z'esse mitbroocht, unn dann sinn mir in sinnem Lade hinte drin uff de Stapel vun Perserdeppich g'läge unn hänn g'frühstückt.
Ab unn züä isch er dann grinsend zu uns nach hinte kumme und het g'meynt: "Jetzt hab ich grad widder ä Tourischt ibber's Ohr g'haue unn ihm ä Deppich viel z'diir verkauft", aber bii uns het er g'wißt, dass mir nix bii ihm kaufe däde. Unn des war okay fir ihn.
's Johr druf war ich dann mit minnere damalige Freundin in Istanbul, unn do hab ich ihn widder b'süacht. Er isch mir gliich um de Hals g'falle, unn uff die Froog vun minnere Freundin, ob er sich wirklich noch an mich erinnere däd, het er g'sayt: "Ha klar! Der war doch immer mit dem Amerikaner bii mir unn het sich's g'miätlich g'macht, aber 'kauft hänn die zwei nie ebbis!"
Vor minnem dritte B'süach in Istanbul isch er aber, so hänn die andere Deppichhändler verzehlt, nach Amerika üssg'wandert.

Ich bin sicher, er macht dert sinnen Weg, nickt
De Bischemer

Savanne

Ich druck jo echt d'Düüme! Hoffentlich krieg mir vun dem Rääge, der wu fir hit unn 's Wocheend verherg'sayt isch, au emol ebbis ab!
Bii uns in Bischem het's jetzt sither acht, niin Woche insgesamt viellicht vier Liter uff de Quadratmeter g'rägelt! Entsprechend lätz sieht unser Garde au üss. Wenn mir nit alli ein, zwei Dag mit'm Schlych spritze däde, dann däd wahrschiins gar nix meh wachse. Unn au so sähne manchi Baim unn Büsch echt mitg'numme üss.
Unn de Rhiin sotte Ihr mol sähne. Do sieht ma Sandbänk, die hab ich in minnene ganze fuffzehn Johr in dere Gegend noch nie g'sähne!


Rheinhesse isch zwar schun immer so ziemlich die trockendscht' Gegend in Ditschland, aber so langsam entwickelt sich des echt zu 'ere Savanne, hab ich's G'fühl!
Wenn's so witter geht, dann werre ma in Zukunft kei Tomate unn Epfel, sondern Agave unn Zitrone anbaue, fürcht ich.

Aber viellicht werre ma jo hitt nass, hofft
De Bischemer

Hotellerie

Ich glaub, ich fang demnägschd ä Nebejob an. Unn zwar wirr ich in 's Hotellerie- unn Gaschtstätteg'werb iischtiige... 's erschte Hotel hämmer nämlich schun 'baut, unn de Zuspruch isch phänomenal:


Okay, es isch nur ä Insektehotel, aber wenn ma mol ä baar Minüte do dävor steht unn züälüägt, wie die kleine Wildbiene unn des andere Getier, was ich gar nit genau kenn, do rumschwirrt unn in die Löcher nii schlupft, dann het ma ä echter Spaß dran! (Des eine "Zimmer", was noch frei isch, des wird ä Schmetterlingsunterschlupf fir de Winter. Des isch noch nit so dringend g'sii...)
Unn ä tolli Reschtholzverwertung unn ä scheen's Baschtelprojekt war's au noch!
Üsserdem (au wenn des mit dem Hotel direkt nix z'düä het) macht sich inzwische unser naturnaher Garde positiv bemerkbar. Iiberall krabble zum Beispiel Mariekäfer, Mariekäferlarve unn Florfliegelarve uff de Baim rum unn fresse sich an Blattliis satt! So soll de sii!

Unn g'sünder isch es au noch, freyt sich
De Bischemer

Vorfreyd

Quasi an minnem Geburtsdag (genau g'numme ä Dag später, was aber wege dem Fiirdig eigentlich nit zählt) mache mir endlich unser Biggesee-Revival! Unn will nebe Mainz, Trier unn Ibbenbüren (unn Bischem nadierlich) jetzt au noch Dresden als Startpunkt däzüe kumme isch, werre mir uns dieses Mol ä Sternfahrt nach Marburg mache unn dert quasi mitte in de Stadt zelte!


Üss fascht schun alter Tradition bin ich widder de "Organisator" g'sii, aber mit dere Wahl sinn dann au alli iiverstande g'sii. Unn 's hänn quasi alli züäg'sait, bis uff einer, der dann in Indonesie isch! Die Üssred will ich mol gelte lehn...!
Ich frey mich echt jetzt schun druf, die ganze liäbe Litt widder z'sähne... Vum zelte, grille, Bierli-trinke unn dumm babble ganz abg'sähne! Unn in Marburg war ich au noch nit, des wird eh mol Zitt, sich die Stadt anz'schaue. Die soll jo so ä scheeni, romantischi Altstadt ha... Ich bin jo mol g'spannt!

Nur noch drey Woche, strahlt
De Bischemer

Uffgabe

Ich will jo nit sentimental werre, aber ich Eych eigentlich bewußt, wie scheen des Lebe isch?? Wenn nit, dann hab ich ä baar Uffgabe fir Eych für die kommend' Woch:


Lehn Eych d'Sunn uff d'Hütt schiine. Unn falls es echt ball mol rägle sott, dann gehn au mol nüss unn lehn Eych naß rägle. Laufe mol mit blutte Fiäß morgens durch's Gras. Ziäge Eyri Lieblingsklamotte an, damit sie nit bloß im Schrank verstaube. Fange irgend ebbis Ney's an, was ihr schun immer hänn mache welle. Heere morgens mol ganz bewußt de Vögel züe, wie scheen die singe! Danze, wänn Eych dänooch isch. Egal wu. Unn vergesse nit, ab unn züe mol widder ebbis Verruckt's z'mache! Heere lütt Müssig (egal, was fir welchi), unn drucke ebber, der Eych wichtig isch, ganz fescht an Eych. Unn dann sage ihm au, dass er Eych wichtig isch! Freye Ech an allem, was um Eych rum isch! Mache Eych bewußt, wie scheen des Lebe isch! Unn denke dran: Es leyt hautsächlich an Eych, was Ihr d'rüss macht!

Ä tolli Woch wünscht Eych
De Bischemer

D'Ortenau vun wittem (9)

D'Iisebahnbruck vun Oberschopfe nach Schuttern isch abg'risse worre.

Schun in minnene Kinderzitte war die Bruck jo ziemlich alt. So eng, dass kein zwei Audos an änander durch kumme sinn, unn mit dicke Bloodere im Belag. Aber zum dribber fahre war sie jo trotzdem immer güät g'nüä. Kann mir eigentlich ebber sage, warum sie jetzt schlußendlich abg'risse worre isch??

Am Palmsunndig, als mir in Oberschopfe ware, hämmer denne Riesekran vun de B3 üss schun stehn g'sähne. Unn jetzt isch an Oschtere die Bruck tatsächlich abbaut worre... Ich bin jo echt g'spannt, ob do demnägscht widder ä neji Bruck hinkummt. Des hängt jo wahrschiins au mit 'm vierspurige Üssbau vun de Bahngleise z'sämme. Unn ob DER jetzt mit 'ere griäne Regierung umg'setzt wird, des weiß wohl momentan eh keiner...

Wer jetzt zum Beispiel an de Oberschopfener Baggersee will, der müäß entweder ibber Schuttern oder ibber Niederschopfe fahre. Eigentlich jo ä ibberschaubarer Schlenker... Aber wenn ich dran denk, wie mir friäjer mit'm Fahrrad vollpackt an de Baggersee (unn miäd widder heim) g'fahre sin, do wäre die zwei, drey Kilometer Umweg wahrschien Grund g'sii, ibber de Baggerseeb'süach noch emol nooch z'denke... Do hätt ma au gliich an de Schutterner oder de Niederschopfener Baggersee fahre kinne... Uff "unsere" Sitt von de Bahn het's jo leider kei Alternative gää...

Aber jetzt isch des Stück Kindheit endgültig furt, sinniert
De Bischemer

's Wunderlied

Roote mol, well des Lied isch, was ich am meischte sing..?!? Ihr kumme nit druf! Des isch "Tschu tschu tschu, die Eisenbahn"! Schun wu de Lukas noch ä Baby war, do het er sich vun dem Lied richtig güät beruhige lehn. Wenn er obends nit zur Rüäh kumme isch, dann hämmer 'ne rumtrage unn hänn ihm des Lied zig-mol vorg'sunge, bis er endlich iig'schloofe isch.
Unn bii de Lea isch es sogar noch extremer worre. Fir sie isch des des absolute Beruhigungslied! Egal, was bassiert, obends zum iischloofe will sie des Lied heere. Selbscht jetzt, mit vier Johr, wirkt des Lied bii ihre noch Wunder und beruhigt sie besser als Baldrian...
Unn so sing ich des Lied echt JEDE Obend... Immer nemme ma erscht ihri Elli, dann ein, zwei Bubbe, unn am Schluß noch Lea, Lukas, Babba unn Mama mit in de Iisebahn! Unn wehe, sie isch schun so miäd, dass sie kurz wegg'nickt isch unn des Lied nit g'heert het. Dann kann ich grad noch emol singe, sunscht isch "Holland in Not"!
Unn wenn sie mol am'e Dag so richtig wiäscht war, dann isch, glaub ich, des d'schlimmscht Stroof fir sie, wenn sie obends kei "Tschu tschu tschu" g'sunge bekummt! Mann, was isch sie dann verzwiifelt!

's isch halt echt ä Wunderlied, findet
De Bischemer

So gründet ma Traditione...

Letschtes Johr sinn am Oschtermändig minni drey Schweschtere unn ich mit unsere Familie zu de Lendersbachhütti in Oberschopfe g'wandert unn hänn dert 'grillt.
Unn will's so scheen war hämmer des dies Johr am Oschtermändig widder g'macht. Unn Oma unn Opa sinn dies Mol au mit 'gange.
Des het halt au viel Vorteile: D'Kinder (acht an de Zahl!) kinne mitänander rumrenne unn spiele, d'Erwachsene kinne endlich mol in Rüäh mit enander schwätze, unn Oma unn Opa kinne sich g'miätlich däzüe hocke unn sich ä weng üssrüähje.
Unn 's Esse isch au problemlos: Jeder bringt ebbis mit, uff'em Lagerfiir wird z'sämme 'grillt, unn dann reicht's fir alli. Keiner het mehr Ärbet, als er ällei dahei au hätt, un bii niämeds wird daheim 's Hüüs uff de Kopf g'stellt...!
Diesmol war 's Wetter nadierlich au noch traumhaft, do het alles noch emol so viel Spaß g'macht! Des het alles so toll 'klappt, ich bin ziemlich sicher, des werre ma am nägschde Oschtermändig widder mache!

Ä neji Familietradition, freyt sich
De Bischemer

Maxisound

In de Zitt, wu ich noch uff's "Scheffel" in d'Schüäl 'gange bin, do het's jo noch kei SWR gää. Bii uns in Baden war de SWF de Heimatsender, unn d'Schwobe hänn de SWR g'haa. Dass sich die zwei dann plötzlich fusioniert hänn, do het ma sich erscht dran g'wääne miän.
Jedefalls het's bii SWF3 ä Sendung mit'm Frank Laufenberg gää, in derre sin nur Maxi-Singles g'spielt worre. "Maxisound" het die g'heiße unn isch in unregelmäßige Abständ obends vun elf bis zwölf g'loffe.
Bis am zwölfi Radio z'heere war oft echt schwer, wenn ma am nägschde Morge friäj het uffstehn miän. Unn will de Frank Laufenberg immer erscht vor'em letschte Liäd g'sait het, wänn de nägschte "Maxisound" lauft, bin ich oft vor derre Info iig'schloofe.
Zum Glück ware mir in unsere Klass drey Kerli, die wu die Sendung gern g'heert hänn: De Ralf, de Detlef unn ich. So hämmer uns dann am nägschte Morge immer abg'stimmt, wer bis am End däbii bliebe isch, unn einer vun uns drey het dann fascht immer de Termin vun de nägschde Sendung g'wißt.
Ich hab do au immer ä eigeni "Maxisound-Cassette" g'haa, uff die ich die Maxi-Versione uffg'numme hab. Bled war nur, dass der Frank Laufenberg gern am End in d'Lieder nii g'schwätz het, unn des war nadierlich immer schwer widder rüs z'schniide... Was hämmer uns do dribber uffg'regt! Unn will der Maxisound halt nit so oft kumme isch, do het's au immer Woche oder gar Monate düürt, bis so ä Cassette endlich voll war...

Aber ä scheeni Zitt war's trotzdem, findet
De Bischemer

Kataschtroph!!

Also ich hab jo echt ibberlegt, ob ich Eych DIE Kataschtroph ibberhaupt zeige soll.. Aber 's Lebe isch halt emol eins vun de Härteschte, also schaue Eych des nur an:


's heißt nit umsunscht "Höllental", weiß
De Bischemer

Aaaahhh... Hechtsheim!

Ich kinnt schreye...!
Jede, aber wirklich JEDE Dag, wu ich mit'm Fahrrad durch Hechtsheim fahr, reg ich mich ibber die Litt uff! Hechtsheim kriegt jetzt vun mir offiziell de Titel "fahrradunfreundlichschter Ortsteil vun Mainz"!

Entweder mir wird d'Vorfahrt g'numme, ich wirr g'schnitte unn in de Grabe drängt, d'Füäßgänger laufe mir unn z'schaue inn de Weg, oder d'Audos bliebe mitte uff de Strooß vor mir stehn unn zwinge mich zü'ere Vollbremsung...!
Letschtes Johr het mir sogar ä Obba mit'm Rollator (echt, kei Witz!) uffem Rad- unn Gehweg in's Fahrrad 'grätscht unn het mich zum Abstiege zwunge...
Okay, nach'eme feschte Stritt hab ich ihm dann sogar recht gää, dass ich nit ganz korrekt unterwegs war... Aber sunscht... Wenn ich ä g'scheyti Umfahrung hätt, dann däd ich wahrschiens immer ä großer Boge um Hechtsheim mache. Uff ä Riese-Umweg hab ich aber (bisher noch) kei Luscht...

Also witterscht durch, stüümt
De Bischemer

Uff'm Rad!

Hit bin ich zum erschte Mol widder mit'm Rad zum Schaffe g'fahre! Wie scheen! z'erscht hab ich halt widder die Kinder im Kindergarde abg'lade, unn entsprechend hab ich mich dann widder de Bischemer Buckel nuff g'kämpft. Isch sogar ziemlich güät gange hit, däfir dass ich fascht noch nit uff'em Fahrrad g'sesse bin... Aber wahrschiens war des eh die Euphorie vum erschte Dag! Die nägschde Däg werre schlimmer werre!
Aber dann au die Freiheit, im Sunneschiin ibber d'Felder z'fahre, d'Lerche singe z'heere unn de Oschterhas ibber d'Matte hopse z'sähne!
Do müäß ma jo noch nit emol an des g'sparte, diire Benzin denke, damit ma sich güät fühlt! Unn fir'd Fitness hab ich au noch ebbis g'macht! Eigentlich moäßt ma des im Summer echt jede Wärdig mache. Aber mornemorge hock ich erscht mol widder im Audo. Do geh ich direkt vum Schaffe üss zum Schwimme, des isch dann mit'm Fahrrad doch ä weng witt...

Mittwoch aber widder, hofft
De Bischemer

Ä Frau zum Scheff!

Jetzt isch's offiziell: Unser nejer Ditschland-Scheff wird ä Frau! Unn au noch eini, die wu grad emol drey, vier Johr älter isch als ich... Sie isch au schun ganz scheen rumkumme in de Firma!
Do bin ich jo emol g'spannt, ob sich ebbis im Führungsstil ändere wird... Ich hab do allerdings so minni Zwiifel. Zum eine isch die Madamm schun sither ä baar Johr in de G'schäftsführung, unn do müäß sie als Frau sicher mindeschtens so güät sii wie die Männer um sie rum... (sayt ma wenigschtens...) Unn zum andere isch die ney Scheffin eh 's Maidli, als eigentlich 's Ziehkind vum alte Ditschland-Scheff g'sii. Der wird sie sich schun so 'zoge haa, wie er sie gern haa will, bevor er sich in d'Konzernzentrale abmacht.
Ich hab sie bisher ä baar mol uff Veranstaltunge erlebt, do het sie, ganz ehrlich, ä g'mischter Iidruck uff mich g'macht. Kompetent, aber manchmol viellicht ä weng unsicher... Vunn andere, die wu sie besser kenne g'leert hänn, hab ich dann aber widder verzehlt bekumme, dass sie ä ganz scheen härter Knoche sii soll... Was soll's, ich loss des jetzt eifach uff mich züä kumme (ich kann's jo eh nit ändere). Unn viellicht git's jo au ä positivi Iiberraschung??

Unn fesch isch sie allemol, meynt augezwinkernd
De Bischemer

Larry Laffer reloaded

Wu ich in Offeburg studiert hab, do sinn die Computerspiele vun Sierra jo ganz groß g'sii. In derre Zitt hämmer als de PC-Pool in de Fachhochschüäl in viele Pause zum Spiele g'nutzt... Unn daheim hab ich King's Quest unn Space Quest (allerdings uff'em Atari) vun vorne bis hinte durchg'spielt. Unser heimlicher Held war domols allerdings de Larry Laffer, aka. "Leisure Suit Larry"... Kenne Ihr den noch??

Dann hab ich jetzt ebbis fir Eych: Uff dere Websitt kinn Ihr ä baar vun denne Sierra-Spiele online noochspiele... Do werre alti Erinnerunge wach... Uff de andere Sitt fallt mir do au widder uff, wie mühselig des Spiele domols war... in schlechter Ufflösung Sache erkenne, verroote, was ma dämit mache kann, unn wenn ma nit regelmäßig abg'speichert hett immer noch emol vun vorne anfange... Jessis nai!!

Trotzdem viel Spaß wünscht Eych
De Bischemer

Interrail

Vun minnem zweite Interrailtrip hab ich Eych jo schun ä kurzi Impression gää. Do bin ich erscht mit'ere Grupp vun Bekannte ä baar Dag am Gardasee g'sii, unn wu die widder heim g'fahre sinn, do hab ich dann minni Interrail-Tour ang'fange unn bin nunder nach Griecheland. Uff'em Weg nach Istanbul ('s allererschte Mol!) hab ich ä Amerikaner 'troffe, mit dem bin ich dann durch d'Türkei g'reist. In Istanbul hämma zwei richtig nette Maidli (Banu unn Elcin) kenne g'leert, die hänn uns ä baar Dag lang d'ganz Stadt zeigt. Sogar obends mit heim zu denne hämmer derfe! Wahrschiens kummt au do minni "Affinität" zu dere Stadt her :-)
Die zwei hab ich uff minnene nägschde B'süache in Istanbul noch ä baar mol widder 'troffe. Nur den Ami, den hab ich in Zitte, wu ma noch nit alles im Internet dokumentiert, üss da Auge verlore. Unn nachdem de Kontakt zu denne beide Maidli (inzwische jo eigentlich ehnder 'Fraue') au ä weng iig'schloofe isch, hab ich vor Kurzem d'Elcin im Facebook widder g'funde! Des war ä Freyd!
Manchmol frog ich ich mich eh, wie mir friäjer so Rucksackreise g'macht hänn. Kei Internet, kei "Tripadvisor.com", kei Online-Reservierunge oder "Google Maps", ja sogar noch nit emol emails...! Do war's uff Interrail echt noch spannend, wenn da obends in'ner fremde Stadt ankumme bisch un noch nit g'wißt hesch, wu da nachts schloofe wirsch...
Aber manchmol denk ich, ma hat dodurch sogar noch meh erlebt unn noch meh Litt kenne g'leert, will ma sich so oft het durchfrooge mian. Aber vun denne Erlebnisse wirr ich Eych ä anders Mol schriibe.

Fir's Erschte mäüß des lange, meynt
De Bischemer

D'Ortenau vun wittem (8)

Am Wocheend isch in Hausach widder 'jazzed worre.
Des müäß jo ä echt klasse Event g'sii sii, wenn ma denne Bericht so liest.

Für uns war Hausach ("Huse" het's bii uns nie g'heiße) vor allem mit de Discothek "Milieu" verbunde. Do het ma am Dunn'schtig güät hin gehn kinne, des war johrelang ä feschter Programmpunkt in unserer Wocheplanung. Unn richtig nett war's dert am Sunndig obend, wu bii freyem Iitritt Oldies g'spielt worre sinn. Do war au immer weniger los als sunscht, unn ma het sich au emol ganz g'miätlich uff d'Empore sitze unn schwätze kinne. 's Publikum war nadierlich (bis uff ä baar Üssnahme) au anderscht wie in de Arche, unserer Stammdisco, was es dann widder interessant g'macht het.
(Unn die Schwarzwaldmaidli ware au immer ganz b'sunders nett, aber do däfiir sinn ä baar vun uns - des nenn ich "konsequent" - dann ganz nuff in de "Waldpeter" nach Schönwald g'fahre. So witt hab ich's dann doch nit 'triibe..!)

D'Kneipe vun Hausach hänn mir eigentlich nur dann kenne g'leert, wenn ma mol z'friäj unterwegs ware unn vor de Disco noch irgendwo zum babble hing'hockt sin. Aber ganz ehrlich: Ich kann mich an nit ein Lokal wirklich erinnere, also ä bliibender Iidruck hänn die nit uff mich g'macht...!
Um so meh däd mich hitt interessiere, wie des Jazzfestival in denne Kneipe hitz'dag so ribber kummt.

Viellicht schaff ich's jo emol do hin, spekuliert
De Bischemer

Urlaub, verdichtet...

Grad fallt mir uff, dass ich in dem Johr erschte ei einzig's Gedicht in de Blog g'schriebe hab. Do wird's aber Zitt, minni Kos-Impressione emol z'verdichte... (in doppeltem Sinn, grins!) Vor allem, wu sogar de Lukas momentan reimt: "Kinder, wir sind hier auf Kos, uns're Freude, die ist groß"... (Kei Ahnung, warum er des jetzt nooch'em Urlaub immer verzehlt...)
Also:



Kos, des leyt in Griechenland.
Also git's nadierlich Strand.
(Unn fir die, die bade welle
Git's dänebe heißi Quelle!).

Mit'm Audo krizz unn quer
Ibber d'Insel: Isch nit schwer.
Jeder Ort, wie isch des scheen
Isch erreicht im Handumdrehn.

Fir ä Woch jedoch gab's gnüe
Immer noch fir uns zum düe:
Tiere git's in bunter Schar:
Schoof' unn Schildkröt', Pfaue gar!

Massig griechischi Ruine,
Unn Zitron' unn Apfelsine!
Lecker Gyros, Fladebrot,
Uzo macht die Wange rot.

Burge, Berge, Hafe, Plätze,
Unn g'nüä Sand fir uns'ri Schätze.
D'Wiese noch so saftig griän,
Dass ma echt hänn staune miän!

D'Kinder sinn sogar ins Meer
(Aber g'schlottert hänn sie sehr!)
Ganz entspannt war uns'ri Woch...
Griecheland, es lebe hoch!


Do dämit isch alles g'sayt, strahlt
De Bischemer

Zwei Wahle

Geschtern sinn jo in BaWü unn in RLP Landtagswahle g'sii. Unn obwohl ich jetzt jo schun fuffzehn Johr in RLP wohn, war witzigerwiis die Wahl in BaWü wichtiger fir mich...
Okay, dass de "King Kurti" in Mainz widder g'wählt wird, war eh fascht klar. Er isch halt ä echter Landesvadder, der genau zu de Rheinland-Pfälzer basst. Wiin trinke unn babbele, des kann er :-)
Die Frau Klöckner, sinni Konkurrentin, hab ich in de Firma schun emol durch unser Rechenzentrum g'führt, unn schun dert het die mich nit ibberzeugt... Do kann des jo bii de Wahl nix werre!

Aber im Herz bin unn blieb ich halt ä Badener, unn darum war fir mich eh wichtiger, wer in BaWü g'winnt... Dass des nadierlich so ä sensationeller Üssgang nimmt, des het wahrschiins keiner denkt. Eigentlich schun historisch, dass es wohl ä griäner Minipräsi gää wird... Vor allem, wenn ma sieht, dass fascht alli Direktmandate an d'CDU 'gange sinn:



Mol schaue, wie des witter geht, meynt g'spannt
De Bischemer

De Urlaub?? Wie immer...!

So, mir sin widder z'ruck! Unn wie fascht nit anders z'erwarte war: De Urlaub war klasse! So wie eigentlich jeder Urlaub bii uns! Mir mache halt immer eifach nur des, was uns g'fallt, unn wenn d'Familie dann so viel Zitt fir enander het, dann basst's schun!

Unn was soll ma au sage: 's Wetter war toll, d'Insel Kos het g'nüä anz'schaue fir ä Woch, unn drumrum het vun Appartment bis Esse au alles g'stimmt! Unn was hämmer nit alles g'macht...! Bergwandere, Sandburge baue, wildi Schildkröte fange (sowitt ma bii Schildkröte vun "wild" rede kann...), im Naturthermalbad direkt am Meer bade, Schare vun Pfaue füttere, 's antike Sanatorium vum Hippokrates ang'schaut, ä mittelalterlichi Ritterburg erforscht, unn, unn, unn...!

Später git's au ä baar Bilder, jetzt will ich erscht noch ä weng de Bischemer Frühling genieße...!

Mache's güät bis derthin, wünscht
De Bischemer

Mol widder weg!

So, 's isch widder emol so witt. Mir geht uff Tour! Morge friäj geht's fir ä baar Dag nach Griechenland! Mir werre uff Kos fliäge. Des wird um die Zitt zwar noch kei Badeurlaub werre, aber wenigschtens kinn mir de Frühling genieße, am Strand rumbuddle unn die griechisch Atmosphäre uff uns wirke lehn!


De Lea hämmer nadierlich so wenig wie möglich verzehlt, nit dass die widder vor lütter Uffregung im letschte Moment krank wird... Immerhin bin ich die letschte drey Mol am Dag vor'em Urlaub mit ihre bii'm Notarzt g'sii, will mir nit g'wißt hänn, ob mir ibberhaupt fahre / fliäge kinne...
Aber bis jetzt sieht alles güät üss!

Ä güäti Zitt wünsch ich Eych, rüäft
De Bischemer

D'Ortenau vun wittem (8)

Am Samschdig het in fünf Städtli in de Ortenau ä "Warentauschtag" stattg'funde.
Des isch doch echt mol ä klasse Aktion, find ich! Do wird endlich mol ebbis unternumme gege die "Wegwerfg'sellschaft"! Ällei schun der Trend, dass alli Sache (ob Klamotte, Elektronik oder Werkziig) nur noch ä kurzi Zitt lang hebe, will alles möglichscht billig unn in lätzer Qualität g'macht wird. Unn am beschte noch vum andere Ende vun de Welt eimol um de halbe Globus zu uns herg'fiirt!
Jetzt, bii dere Aktion, wird dägege Ziigs, des wu ma nimmi brucht, was aber noch güät isch, witter verschenkt unn gege anders Ziigs 'düscht! Isch des nit vernünftig unn eifach genial?!?

Global denke, regional agiere, propagiert
De Bischemer

's Lebe isch kei Kindergeburtsdag!

Geschtern het d'Lea Geburtsdag g'fiirt. 's ganze Hüüs war rosa dekoriert! Insg'samt sinn sibbe Maidli unn zwei Büäbe (inclusive unsere eigene) bii uns g'sii. Ich kann Eych sage, des isch ä G'schäft!
Zum Glück het's Wetter mitg'macht, sodass mir sie ä Wiili uff Schatzsüach nüss hänn schicke kinne. Aber nooch 'em Küache-esse (Lillifee-Tort, was sunscht?!?) unn G'schenkli üsspacke (unni Rücksicht uff Verluschte) sinn sie dann au eins nooch'em andere ufftaut unn mit de Zitt zum Teil sogar ganz scheen iiberzwerch worre! 's war eigentlich fascht ä Wunder, dass nix bassiert isch!
De Opa hett dann irgendwann die rettend' Idee g'haa, denne Kinder ä Büach vorz'lese, unn ruckzuck sinn sie alli um 'n rum g'hockt unn hänn (mehr oder weniger) ä Rüä gää!
Allerdings het au die Phase nit lang ang'halte...


Unn so ware mir eigentlich alli ganz froh, wu obends die ganz Bagaasch widder abg'holt worre isch! Ja, ja, 's Lebe isch kei Kindergeburtstag.

Unn des isch au güät so, grinst
De Bischemer

Fasent in Kurzform

Ganz formal isch hitt jo erscht Fasentszischdig, aber ich kann jetzt schun emol minni ganz persönlich Bilanz vun de Fasent 2011 ziäge:

- Dies Johr bin ich 's erschte Mol bii 'nem Unzug (wenn au nur uff'em Dorf) mitg'loffe... het echt Spaß g'macht!
- Hallefasent kann richtig witzig sii, wenn ma d'richtige Litt trifft!
- Ich bin vun minnere Frau als Saxophonspieler an de bischemer Müssigverein "verkauft" worre! Mol schaue, ob das au nüchtern
noch so luschtig isch...?!?
- De Mainzer Rosemontagszug (unn vor allem d'Rosenmondnacht dänooch) sinn unn Alkohol eigentlich gar nit z'ertrage!


- D'Kinder sinn, so schiint's, ganz unn gar kei Narresoome. Wenn's nit iiberall Gütseli unn Schockolädli gäb, dann wäre die wohl gar nit uff d'Fasent 'gange!
- Aber vor allem: 's langt jetzt echt widder fir ä Johr!

Also dann, bis nägschdes Johr um die Zitt, meynt
De Bischemer

Süachbegriffe zum Blog (4)

Ma sott jo nit glaube, was d'Litt im Internet alles süache, unn mit was fir Begriffe die Litt (=Ihr) dann minnen Blog finde. Hitt hab ich Eych widder mol die aktuelle "Top 10" z'sämmg'stellt:

10. sähne aldi (... ich kann au nur roode, was der will...?!?)
9. frühstücks kanabee (... git's bii mir nit!)
8. spanisches kaffee lied (... noch nie g'hört..!?!)
7. rezepte für rieberli (... ja he, isch des jetzt ä Kochbüach, oder was??)
6. wu ghersch du na (... des heißt doch: "Wem g'hörsch Dü?")
5. schneelimerick (...jetzt lieber kei Schnee meh', wenn's nach mir geht!)
4. tunnelzelte sturmsicher (... oh je, Dir könnt ich ebbis verzehle!)
3. monatsgedichte von kindern geschrieben (... ha jo, sunscht noch ä Wunsch?!?)
2. Badische vom 9. november 2009 (...sorry, die les ich nur noch online...)
1. stoß mo uff mei schatz (... des badische "uffstoße" isch jo "rülpsen", aber ob des do g'meyt isch??)

Ä scheener Dag wünscht Eych
De Bischemer