Renne oder nit renne??

Friäjer sinn mir jo mol acht Eberschopfener g'sii, wu in d'selb Klass uff'em "Scheffel" in Lohr gange sinn. Unn Samschdigs war jo dertmols au noch Schüäl. (Wie isch den eigentlich hitz'daag??). Am Samschdig isch d'letzscht Stund bis um viertel zwölfi gange, aber genau zu dere Zitt isch au de Bus g'fahre. Unn zwar an de Haltestell ä knapper Kilometer witt weg vun de Schüäl. Fir uns het's nämlich kei Schüälbus gää, mir sinn mit'm Liniebus g'fahre.
Mir Eberschopfener hänn dann irgendwänn ä Iitrag im Klassebüäch g'kriegt, dass mir am Samschdig 10 Minüte friäjer gehn derfe. Sunscht hämma nämlich immer noch ä Stund ällei in de Schüäl rumsitze miän, bis de nägschte Bus g'fahre isch.
Also sinn mir immer schun kurz vor Elfi uff de Stiäl rumg'rutscht unn hänn abg'stimmt, ob mir renne welle oder nit. Dann hämmer alles z'sämme packt unn sinn rüss g'flitzt, unn dann isch's Renne de Berg nuff los gange... Unni renne het's nämlich gar nit g'langt, unn selbst dann isch uns manchmol de Bus noch vor de Nas wegg'fahre. Des war dann erscht recht bled, will ma dann die Zitt an de Bushaltestell rumbringe het miän, unn dert het's eigentlich nix z'mache gää. Manchmol simmer dann üss Langwiel 'em Bus entgege gloffe in d'Stadt nii unn sinn irgendwo an 'ere andere Haltestell iig'stiege. Oder mir sinn noch ä Rundi durch de Stadtpark, bis de nägschde Bus kumme isch.
Do war ich dann irgendwann echt froh, als wenigstens jeder zweite Samschdig schüälfrei war...

Lang isch's her, sinniert
De Bischemer