Cuba, mi amor!

Ich hab's eych angedroht, jetzt git's Details zum Cuba-Urlaub:


In Holguin isch nit viel los
bis uff's "Lebe uff de Strooß".
Wir mit Buggies unn de Kids
Mittedrin: Die war'n die Hits!
Leider wurd die Lea krank,
"Nur" die Gripp.. dem Herr sei Dank!
Drum isch immer einer nur
mit dem Lukas ab uff Tour.


Mit'm Bus ging's trotzdem, hey,
Widder dann nach Camagüey.
Was ma nit erlebe muß
Isch ä B'süach im Krankehuus!
Trotz dem Fahrradtaxi-Fahre
War's de Horror! Ja, mir ware
Wege Lea dert zu viert...
Immerhin, sie wurd kuriert!


Also nix wie los, uff Tour!
Fir ei' Ibernachtung nur
Hin nach Sancti Spiritus
(Drei Stund' widder mit'm Bus).
Trinidad isch nit so witt,
Bloß ä Bus "am Tag" fahrt nit.
Doch fir CUC- (kei Peso-) Schien'
Fahrt au gern ä Taxi hin!


Unn was git's in Trinidad?
Kopfsteinpflaschderstroße satt!
Mit'm Taxi an de Strand,
unn dann Pizza satt, uff d'Hand!
Jede Dag ä großes Iis,
nur der Nepp war dert oft fies.
Wu so viel Tourischte sinn
Langt halt jeder gern mol hin!


Nach Havanna mit'm Bus
(bled, daß d'Lea kotze muß...)
Doch die Stadt, Du glaubsch' es nit,
Isch nur Streß, unn doch de Hit!
Lärmig... dreckig... wunderscheen!
Ma will furt unn doch nit gehn!
Altstadt, Autos, Malecón,
Mensch, do draimsch noch lang devon!


In Viñales, oh wie scheen
Kamma endlich "Landschaft" sehn!
Großi, dicki Kalksteinhubbel,
Allerorts steht so ä Knubbel!
Roter Staub uff alle Strooße
(...unn mit Kinder: Uff de Hose -
Der isch sicher jetzt noch drin!)
Trotzdem will ich widder hin...


Leider (des isch immer dumm)
War der Urlaub dann schu' rum.
Rucksack packe, s'Herz wird schwer,
Heim will jetzt jo keiner mehr.
Selbscht die Kinder, daß Ihr's wißt
Hänn nix vun daheim vermißt!
's hilft jo nix, ma muß retour,
's ware halt drei Woche nur!



Selbscht jetzt isch Cuba noch intensiv im Kopf wie selte ebbis, schwärmt
De Bischemer